chashm-e-saqi kausar-o-tasnim par dekha kiye

chashm-e-sāqī kausar-o-tasnīm par dekhā kiye

piine vaale pī rahe the ham udhar dekhā kiye

kis maze se rauza-e-ḳhairul-bashar dekhā kiye

dekhne vāloñ kā ham husn-e-nazar dekhā kiye

vajd sā thā dil pe taarī aañkh se aañsū ravāñ

yuuñ dar-e-aqdas ko ham āThoñ pahar dekhā kiye

ahl-e-zāhir kī nazar us tak pahuñchtī kyā majāl

jo tajallī aap ke āshufta-sar dekhā kiye

phuul thā har zarra ḳhāk-e-pāk-e-taiba kā magar

hosh chunñe kā kise thā be-ḳhabar dekhā kiye

is tamanna meñ ki paa.eñ naqsh-e-pā to chuum leñ

tere dīvāne tirī har rahguzar dekhā kiye

ye dayār-e-pāk kī galiyoñ kā dekhā mo'jiza

shauq baḌhtā hī rahā ham jis qadar dekhā kiye

gulshan-e-taiba meñ zikr-e-ātish-e-namrūd kyā

bijliyoñ ko bhī yahāñ ham be-asar dekhā kiye

bazm-e-anjum bazm-e-gul nazroñ se ḳhud gir jā.egī

rauza-e-anvar ko rozāna agar dekhā kiye

daulat-e-īmāñ se jin kī qismateñ mahrūm thiiñ

apne hāthoñ vo shaqī rāh-e-saqar dekhā kiye

har karishma dāman-e-dil khīñchtā thā kufr kā

dekh to sakte na the dushman magar dekhā kiye

muddatoñ 'mahvī' rahe sultān us dar ke faqīr

hāsil-e-pā-bosī-e-ḳhairul-bashar dekhā kiye

chashm-e-saqi kausar-o-tasnim par dekha kiye

pine wale pi rahe the hum udhar dekha kiye

kis maze se rauza-e-KHairul-bashar dekha kiye

dekhne walon ka hum husn-e-nazar dekha kiye

wajd sa tha dil pe tari aankh se aansu rawan

yun dar-e-aqdas ko hum aaThon pahar dekha kiye

ahl-e-zahir ki nazar us tak pahunchti kya majal

jo tajalli aap ke aashufta-sar dekha kiye

phul tha har zarra KHak-e-pak-e-taiba ka magar

hosh chunne ka kise tha be-KHabar dekha kiye

is tamanna mein ki paen naqsh-e-pa to chum len

tere diwane teri har rahguzar dekha kiye

ye dayar-e-pak ki galiyon ka dekha mo'jiza

shauq baDhta hi raha hum jis qadar dekha kiye

gulshan-e-taiba mein zikr-e-atish-e-namrud kya

bijliyon ko bhi yahan hum be-asar dekha kiye

bazm-e-anjum bazm-e-gul nazron se KHud gir jaegi

rauza-e-anwar ko rozana agar dekha kiye

daulat-e-iman se jin ki qismaten mahrum thin

apne hathon wo shaqi rah-e-saqar dekha kiye

har karishma daman-e-dil khinchta tha kufr ka

dekh to sakte na the dushman magar dekha kiye

muddaton 'mahwi' rahe sultan us dar ke faqir

hasil-e-pa-bosi-e-KHairul-bashar dekha kiye