har dard ka hota hai darman madine mein

har dard kā hotā hai darmān madīne meñ

ḳhāliq kā bhī hotā hai irfān madīne meñ

ḳhāk-e-dar-e-aqdas par rakhtī hai jabīñ duniyā

is tarah nikalte haiñ armān madīne meñ

īmāñ kī fazā.eñ haiñ īmāñ kī havā.eñ haiñ

hotā hai ġharaz kāmil īmān madīne meñ

vahdat kī vahāñ tābish rahmat kī vahāñ bārish

baḳhshish kā hamārī hai sāmān madīne meñ

ye merā aqīda hai ye dil kā aqīda hai

hotī hai har ik mushkil āsān madīne meñ

phir jaate haiñ din us ke mil jaatī hai jaañ us ko

jaatā hai agar koī be-jān madīne meñ

'bahzād' guzarte haiñ yuuñ ziist ke din mere

maiñ hind meñ rahtā huuñ hai jaan madīne meñ

har dard ka hota hai darman madine mein

KHaliq ka bhi hota hai irfan madine mein

KHak-e-dar-e-aqdas par rakhti hai jabin duniya

is tarah nikalte hain arman madine mein

iman ki fazaen hain iman ki hawaen hain

hota hai gharaz kaamil iman madine mein

wahdat ki wahan tabish rahmat ki wahan barish

baKHshish ka hamari hai saman madine mein

ye mera aqida hai ye dil ka aqida hai

hoti hai har ek mushkil aasan madine mein

phir jate hain din us ke mil jati hai jaan us ko

jata hai agar koi be-jaan madine mein

'bahzad' guzarte hain yun zist ke din mere

main hind mein rahta hun hai jaan madine mein