jahan rauza-e-pak-e-KHair-ul-wara hai wo jannat nahin hai to phir aur kya hai

jahāñ rauza-e-pāk-e-ḳhair-ul-varā hai vo jannat nahīñ hai to phir aur kyā hai

kahāñ maiñ kahāñ ye madīne kī galiyāñ ye qismat nahīñ hai to phir aur kyā hai

mohammad kī azmat ko kyā pūchhte ho ki vo sāhib-e-qāb-e-qausain Thahre

bashar kī sar-e-arsh mehmāñ-navāzī ye azmat nahīñ hai to phir aur kyā hai

jo aasī ko dāman meñ apne chhupā le jo dushman ko bhī zaḳhm khā kar duā de

use aur kyā naam degā zamāna vo rahmat nahīñ hai to phir aur kyā hai

shafā.at qayāmat kī taabe nahīñ hai ye chashma to roz-e-azal se hai jaarī

ḳhatā-kār bandoñ pe lutf-e-musalsal shafā.at nahīñ hai to phir aur kyā hai

qayāmat kā ik din muayyan hai lekin hamāre liye har nafas hai qayāmat

madīne se ham jāñ-nisāroñ kī duurī qayāmat nahīñ hai to phir aur kyā hai

tum 'iqbāl' ye na.at kah to rahe ho magar ye bhī sochā ki kyā kar rahe ho

kahāñ tum kahāñ mad.h-e-mamdūh-e-yazdāñ ye jur.at nahīñ hai to phir aur kyā hai

jahan rauza-e-pak-e-KHair-ul-wara hai wo jannat nahin hai to phir aur kya hai

kahan main kahan ye madine ki galiyan ye qismat nahin hai to phir aur kya hai

mohammad ki azmat ko kya puchhte ho ki wo sahib-e-qab-e-qausain Thahre

bashar ki sar-e-arsh mehman-nawazi ye azmat nahin hai to phir aur kya hai

jo aasi ko daman mein apne chhupa le jo dushman ko bhi zaKHm kha kar dua de

use aur kya nam dega zamana wo rahmat nahin hai to phir aur kya hai

shafaat qayamat ki tabe nahin hai ye chashma to roz-e-azal se hai jari

KHata-kar bandon pe lutf-e-musalsal shafaat nahin hai to phir aur kya hai

qayamat ka ek din muayyan hai lekin hamare liye har nafas hai qayamat

madine se hum jaan-nisaron ki duri qayamat nahin hai to phir aur kya hai

tum 'iqbaal' ye nat kah to rahe ho magar ye bhi socha ki kya kar rahe ho

kahan tum kahan madh-e-mamduh-e-yazdan ye jurat nahin hai to phir aur kya hai