jis ka mushtaq hai KHud arsh-e-barin aaj ki raat

jis kā mushtāq hai ḳhud arsh-e-barīñ aaj kī raat

umm-e-hānī ke vo ghar meñ hai makīñ aaj kī raat

aañkh meñ arz-e-tamannā kī jhalak lab pe darūd

aa.e is shaan se jibrīl-e-amīñ aaj kī raat

saare nabiyoñ ke haiñ jhurmuT meñ nabī-e-āḳhir

qābil-e-dīd hai aqsā kī zamīñ aaj kī raat

nuur kī gard uḌātā huā pahuñchā jo burāq

rahguzar ban ga.ī tāroñ kī jabīñ aaj kī raat

ik maqām aaya ki jibrīl kā bhī saath chhuTā

vo haiñ aur silsila-e-nūr-e-mubīñ aaj kī raat

ālam-e-quds ke asrār koī kyā jaane

vo hī vo haiñ na zamāñ hai na zamīñ aaj kī raat

muskurā.e jo nabī dekh ke jannat kī taraf

aur bhī ho ga.ī firdaus hasīñ aaj kī raat

jis ka mushtaq hai KHud arsh-e-barin aaj ki raat

umm-e-hani ke wo ghar mein hai makin aaj ki raat

aankh mein arz-e-tamanna ki jhalak lab pe darud

aae is shan se jibril-e-amin aaj ki raat

sare nabiyon ke hain jhurmuT mein nabi-e-aKHir

qabil-e-did hai aqsa ki zamin aaj ki raat

nur ki gard uData hua pahuncha jo buraq

rahguzar ban gai taron ki jabin aaj ki raat

ek maqam aaya ki jibril ka bhi sath chhuTa

wo hain aur silsila-e-nur-e-mubin aaj ki raat

aalam-e-quds ke asrar koi kya jaane

wo hi wo hain na zaman hai na zamin aaj ki raat

muskurae jo nabi dekh ke jannat ki taraf

aur bhi ho gai firdaus hasin aaj ki raat