kahan main kahan madh-e-zat-e-girami

kahāñ maiñ kahāñ mad.h-e-zāt-e-girāmī

na 'sa.dī' na 'rūmī' na 'qudsī' na 'jāmī'

pasīne-pasīne huā jā rahā huuñ

kahāñ ye zabāñ aur kahāñ nām-e-nāmī

salām us shahanshāh-e-har-do-sarā par

darūd us imām-e-saf-e-ambiyā par

payāmī to be-shak sabhī mohtaram haiñ

magar allah allāh ḳhusūsī payāmī

falak se zamīñ tak hai jashn-e-charāġhāñ

ki tashrīf laate haiñ shāh-e-rasūlāñ

ḳhushā-jalva-e-māhtāb-e-mujassam

zahe āmad-e-āftāb-e-tamāmī

koī aisā haadī dikhā de to jāneñ

koī aisā mohsin batā de to jāneñ

kabhī dostoñ par nazar ehtisābī

kabhī dushmanoñ se bhī shīrīñ kalāmī

itā.at ke iqrār bhī har qadam par

shafā'at kā iqrār bhī har nazar meñ

usūlan ḳhatāoñ pe tambīh lekin

mizājan ḳhatā-kār bandoñ ke haamī

ye aañsū jo āñkhoñ se merī ravāñ haiñ

atā-e-shahanshāh-e-kaun-o-makāñ haiñ

mujhe mil gayā jām-e-sahbā-e-kausar

mire kaam aa.ī mirī tishna-kāmī

faqīroñ ko kyā kaam tabl-o-alam se

gadāoñ ko kyā fikr jāh-o-hasham kī

abāoñ qabāoñ kā maiñ kyā karūñgā

'atā ho gayā mujh ko tāj-e-ġhulāmī

unheñ sidq-e-dil se bulā ke to dekho

nadāmat ke aañsū bahā ke to dekho

liye jaao uqbā meñ nām-e-mohamād

shafā'at kā zāmin hai ism-e-girāmī

kahan main kahan madh-e-zat-e-girami

na 'sadi' na 'rumi' na 'qudsi' na 'jami'

pasine-pasine hua ja raha hun

kahan ye zaban aur kahan nam-e-nami

salam us shahanshah-e-har-do-sara par

darud us imam-e-saf-e-ambiya par

payami to be-shak sabhi mohtaram hain

magar allah allah KHususi payami

falak se zamin tak hai jashn-e-charaghan

ki tashrif late hain shah-e-rasulan

KHusha-jalwa-e-mahtab-e-mujassam

zahe aamad-e-aftab-e-tamami

koi aisa hadi dikha de to jaanen

koi aisa mohsin bata de to jaanen

kabhi doston par nazar ehtisabi

kabhi dushmanon se bhi shirin kalami

itaat ke iqrar bhi har qadam par

shafa'at ka iqrar bhi har nazar mein

usulan KHataon pe tambih lekin

mizajan KHata-kar bandon ke hami

ye aansu jo aankhon se meri rawan hain

ata-e-shahanshah-e-kaun-o-makan hain

mujhe mil gaya jam-e-sahba-e-kausar

mere kaam aai meri tishna-kaami

faqiron ko kya kaam tabl-o-alam se

gadaon ko kya fikr jah-o-hasham ki

abaon qabaon ka main kya karunga

'ata ho gaya mujh ko taj-e-ghulami

unhen sidq-e-dil se bula ke to dekho

nadamat ke aansu baha ke to dekho

liye jao uqba mein nam-e-mohamad

shafa'at ka zamin hai ism-e-girami