kise inkar ho sakta hai is raushan haqiqat se

kise inkār ho saktā hai is raushan haqīqat se

ki duniyā jagmagā uTThī tire nūr-e-risālat se

miTā dī dushmanī sadiyoñ kī e'jāz-e-sadāqat se

diloñ ko bhar diyā nūr-e-uḳhuvvat rang-e-vahdat se

'ajab andāz the un ke 'ajab e'jāz the un ke

jhukā diiñ sarkashoñ kī gardaneñ ā.īn-e-hikmat se

yahī hai hāsil-e-kaunain sarmāya mire dil kā

kabhī ḳhālī na ho yā-rab mohammad kī mohabbat se

misāl aadam se le kar aaj tak aisī nahīñ nahīñ miltī

ki yuuñ kaayā palaT dī ho kisī ne 'azm-o-himmat se

ḳhudārā jald pahuñchā dījiye mujh ko madīne meñ

dar-e-aqdas pe rakh duuñ maiñ jabīñ fart-e-‘aqīdat se

ta'ālallah hai pesh-e-nazar vo jalva-e-rā'nā

jagāyā jis kī tābish ne jahāñ ko ḳhvāb-e-ġhaflat se

jinheñ thā shikva-e-qismat vo apnī jholiyāñ bhar leñ

jamāl-e-ḳhulq-e-hazrat se kamāl-e-ādmiyyat se

mubārak āsmāñ vaalo mubārak ai zamīñ vaalo

zamāna raushnī letā hai un kī har hidāyat se

matā'-e-'ilm-o-hikmat kis qadar arzāñ huī yā-rab

falak vaale zamīñ ko dekhte haiñ saḳht hairat se

zahe-qismat sar-e-'mahvī' hai ab us āstāne par

baḌā rutba milā ik be-navā ko un kī mid.hat se

kise inkar ho sakta hai is raushan haqiqat se

ki duniya jagmaga uTThi tere nur-e-risalat se

miTa di dushmani sadiyon ki e'jaz-e-sadaqat se

dilon ko bhar diya nur-e-uKHuwwat rang-e-wahdat se

'ajab andaz the un ke 'ajab e'jaz the un ke

jhuka din sarkashon ki gardanen aain-e-hikmat se

yahi hai hasil-e-kaunain sarmaya mere dil ka

kabhi KHali na ho ya-rab mohammad ki mohabbat se

misal aadam se le kar aaj tak aisi nahin nahin milti

ki yun kaya palaT di ho kisi ne 'azm-o-himmat se

KHudara jald pahuncha dijiye mujh ko madine mein

dar-e-aqdas pe rakh dun main jabin fart-e-‘aqidat se

ta'alallah hai pesh-e-nazar wo jalwa-e-ra'na

jagaya jis ki tabish ne jahan ko KHwab-e-ghaflat se

jinhen tha shikwa-e-qismat wo apni jholiyan bhar len

jamal-e-KHulq-e-hazrat se kamal-e-admiyyat se

mubarak aasman walo mubarak ai zamin walo

zamana raushni leta hai un ki har hidayat se

mata'-e-'ilm-o-hikmat kis qadar arzan hui ya-rab

falak wale zamin ko dekhte hain saKHt hairat se

zahe-qismat sar-e-'mahwi' hai ab us aastane par

baDa rutba mila ek be-nawa ko un ki midhat se