mahbub hain hamare nabi zul-jalal ke

mahbūb haiñ hamāre nabī zul-jalāl ke

tauqīr un kī aa'lā hai rutbe kamāl ke

lā'l-o-guhar kā zikr vo karte nahīñ kabhī

zarre 'atā hue jinheñ un ke ni'āl ke

qismat pe un kī merī bhī qismat nisār hai

jin ko nabī ne rakkhā hai qadmoñ meñ Daal ke

sadqa agar na miltā use husn-e-shāh kā

charche na hote aaj yuuñ husn-e-hilāl ke

mujh ko hisār-e-lutf meñ rakhte haiñ mustafā

haiñ duur mujh se is liye lamhe zavāl ke

apne to apne kahte haiñ aġhyār bhī yahī

atvār ḳhūb-rū haiñ shah-e-ḳhush-ḳhisāl ke

aate haiñ jis meñ har ghaḌī sardār-e-ambiyā

girvīda ham bhī haiñ usī raushan ḳhayāl ke

ho jaa.e fan pe māh-e-'arab kī jo ik nazar

ash'ār naa't ke hoñ mire bhī kamāl ke

phirtā hai le ke hijr kā ġham dar-ba-dar huzūr

'nāzāñ' ko bhī 'atā kareñ lamhe visāl ke

mahbub hain hamare nabi zul-jalal ke

tauqir un ki aa'la hai rutbe kamal ke

la'l-o-guhar ka zikr wo karte nahin kabhi

zarre 'ata hue jinhen un ke ni'al ke

qismat pe un ki meri bhi qismat nisar hai

jin ko nabi ne rakkha hai qadmon mein Dal ke

sadqa agar na milta use husn-e-shah ka

charche na hote aaj yun husn-e-hilal ke

mujh ko hisar-e-lutf mein rakhte hain mustafa

hain dur mujh se is liye lamhe zawal ke

apne to apne kahte hain aghyar bhi yahi

atwar KHub-ru hain shah-e-KHush-KHisal ke

aate hain jis mein har ghaDi sardar-e-ambiya

girwida hum bhi hain usi raushan KHayal ke

ho jae fan pe mah-e-'arab ki jo ek nazar

ash'ar na't ke hon mere bhi kamal ke

phirta hai le ke hijr ka gham dar-ba-dar huzur

'nazan' ko bhi 'ata karen lamhe visal ke