rasul-e-mujtaba kahiye mohammad mustafa kahiye

rasūl-e-mujtabā kahiye mohammad mustafā kahiye

ḳhudā ke baa'd bas vo haiñ phir is ke baa'd kyā kahiye

sharī.at kā hai ye isrār ḳhatm-ul-ambiyā kahiye

mohabbat kā taqāzā hai ki mahbūb-e-ḳhudā kahiye

jab un kā zikr ho duniyā sarāpā gosh ho jaa.e

jab un kā naam aa.e marhabā salle-alā kahiye

mire sarkār ke naqsh-e-qadam sham-e-hidāyat haiñ

ye vo manzil hai jis ko maġhfirat kā rāsta kahiye

mohammad kī nubuvvat dā.era hai nūr-e-vahdat kā

isī ko ibtidā kahiye isī ko intihā kahiye

ġhubār-e-rāh-e-taiba surma-e-chashm-e-basīrat hai

yahī vo ḳhaak hai jis ḳhaak ko ḳhāk-e-shifā kahiye

madīna yaad aatā hai to phir aañsū nahīñ rukte

mirī āñkhoñ ko 'māhir' chashma-e-āb-e-baqā kahiye

rasul-e-mujtaba kahiye mohammad mustafa kahiye

KHuda ke ba'd bas wo hain phir is ke ba'd kya kahiye

shariat ka hai ye israr KHatm-ul-ambiya kahiye

mohabbat ka taqaza hai ki mahbub-e-KHuda kahiye

jab un ka zikr ho duniya sarapa gosh ho jae

jab un ka nam aae marhaba salle-ala kahiye

mere sarkar ke naqsh-e-qadam sham-e-hidayat hain

ye wo manzil hai jis ko maghfirat ka rasta kahiye

mohammad ki nubuwwat daera hai nur-e-wahdat ka

isi ko ibtida kahiye isi ko intiha kahiye

ghubar-e-rah-e-taiba surma-e-chashm-e-basirat hai

yahi wo KHak hai jis KHak ko KHak-e-shifa kahiye

madina yaad aata hai to phir aansu nahin rukte

meri aankhon ko 'mahir' chashma-e-ab-e-baqa kahiye