رسولوں میں ممتاز و اکبر تمہیں ہو

رسولوں میں ممتاز و اکبر تمہیں ہو

پیمبر بھی مانے پیمبر تمہیں ہو

تمہاری تجلی ہے کون و مکاں میں

حقیقت میں ماہ منور تمہیں ہو

تمہیں نے دکھائی ہے راہ حقیقت

تمامئ عالم کے رہبر تمہیں ہو

کہو تو تمہیں راز دل کا بتا دوں

سنو حسرت قلب مضطر تمہیں ہو

بناؤ تو مرضی بگاڑو تو مرضی

کہ قسمت تمہیں ہو مقدر تمہیں ہو

تمہاری طرف ہی نظر عاصیوں کی

شفاعت کن یوم محشر تمہیں ہو

تمہیں تو ہو بہزادؔ کے دل میں پنہاں

مدینہ میں بھی جلوہ گستر تمہیں ہو