salam us zat-e-aqdas par salam us faKHr-e-dauran par

salām us zāt-e-aqdas par salām us faḳhr-e-daurāñ par

hazāroñ jis ke ehsānāt haiñ duniyā-e-imkāñ par

salām us par ki aaya rahmatullilālamīñ ban kar

payām-e-dost le kar sādiq-ul-vā'd-o-amīñ ban kar

salām us par jalā.ī sham.a-e-irfāñ jis ne sīnoñ meñ

kiyā haq ke liye betāb sajdoñ ko jabīnoñ meñ

salām us par banāyā jis ne dīvānoñ ko farzāna

mai-e-hikmat kā chhalkāyā jahāñ meñ jis ne paimāna

baḌe chhoTe meñ jis ne ik uḳhuvvat kī binā Daalī

zamāne se tamīz-e-bandā-o-āqā miTā Daalī

salām us par faqīrī meñ nihāñ thī jis kī sultānī

rahā zer-e-qadam jis ke shikoh-o-farr-e-ḳhāqānī

salām us par jo hai āsūda zer-e-gumbad-e-ḳhazrā

zamāna aaj bhī hai jis ke dar par nāsiya-farsā

salām us zāt-e-aqdas par hayāt-e-jāvedānī kā

salām 'āzād' kā 'āzād' kī rangīñ bayānī kā

salam us zat-e-aqdas par salam us faKHr-e-dauran par

hazaron jis ke ehsanat hain duniya-e-imkan par

salam us par ki aaya rahmatullilalamin ban kar

payam-e-dost le kar sadiq-ul-wa'd-o-amin ban kar

salam us par jalai shama-e-irfan jis ne sinon mein

kiya haq ke liye betab sajdon ko jabinon mein

salam us par banaya jis ne diwanon ko farzana

mai-e-hikmat ka chhalkaya jahan mein jis ne paimana

baDe chhoTe mein jis ne ek uKHuwwat ki bina Dali

zamane se tamiz-e-banda-o-aqa miTa Dali

salam us par faqiri mein nihan thi jis ki sultani

raha zer-e-qadam jis ke shikoh-o-farr-e-KHaqani

salam us par jo hai aasuda zer-e-gumbad-e-KHazra

zamana aaj bhi hai jis ke dar par nasiya-farsa

salam us zat-e-aqdas par hayat-e-jawedani ka

salam 'azad' ka 'azad' ki rangin bayani ka