زندگی مجھ پر تو میں بھی زیست پر نازاں ہوا

زندگی مجھ پر تو میں بھی زیست پر نازاں ہوا

مشغلہ جب سے مرا مدح شہ ذیشاں ہوا

عکس حسن ذات سے یہ سب سر و ساماں ہوا

جلوہ زار زندگی آئینۂ حیراں ہوا

عشق احمد داستان زیست کا عنواں ہوا

کس قدر اچھا علاج گردش دوراں ہوا

کوئے احمد کا تصور لے کے میں جب چل پڑا

راستے کا گوشہ گوشہ آئنہ ساماں ہوا

محسن انسانیت اے ہادیٔ نوع بشر

تیرے فیضان نظر سے آدمی انساں ہوا

ذکر احمدؐ سے مجھے ہر رنج میں راحت ملی

اسم احمد سے مرے ہر درد کا درماں ہوا

آپ کا دور سعادت کیا مبارک دور تھا

قدرداں اس دور میں انسان کا انساں ہوا

یہ زمیں یہ آسماں تسنیم و کوثر سلسبیل

سب کچھ اس کا ہے جو تیرا تابع فرماں ہوا

اے تعالی اللہ تری تعلیم انساں دوستی

فیض سے تیرے گدا بھی ہمسر سلطاں ہوا

ہے مسلسل نعت گوئی کا جمالیؔ یہ صلہ

نام تیرا بھی ثنا خوان شہ ذیشاں ہوا