minar-e-sukut

vaqt ko sahrā kahūñ yā bahr-e-be-sāhil kahūñ

raat hai reg-e-ravāñ kī lahr yā ki mauj-e-āb-e-zindagī

taare jugnū haiñ ki motī phuul haiñ yā sīpiyāñ

kahkashāñ hai dhuul tāroñ kī ki mauj-e-pur-ḳharosh-o-dur-fashāñ

soch kī chiñgāriyāñ uḌtī haiñ yuuñ

jaise dil par choT paḌtī ho kisī ehsās kī

jaise maiñ tanhā nahīñ

vaqt ke sahrā meñ jaise an-ginat saa.e ubhar kar merī jānib

dauḌte aate huuñ

saa.e

biitī sadiyāñ jaise par phailā.e uThīñ gol gol

apnī lāsheñ chhoḌ kar merī taraf aa.iiñ

ki jaise noch khā.eñgī mujhe

aur phir murda lāsheñ yak-ba-yak vahshī bagūloñ kī tarah

raqs kartī chār-sū

Dhol-tāshoñ aur naqqāroñ kī haibat-nāk āvāzoñ pe raqs

khaḌkhaḌātī haDDiyāñ ḳhud sho.ale ban kar nāchtī haiñ chār-sū

aur ik zartusht sajda rez ho kar

un kī haibat un kī azmat un kī be-rahmī ko kartā ho salām

aur vo

us ko apnī gul-fishāñ āġhosh meñ le kar uThīñ

jaise maañ

apne bachche ko uThā.e

aur maiñ

vaqt ke be-rahm hāthoñ meñ hoñ jaise gidh ke changul meñ koī zinda parind

biitī sadiyāñ shab ke sannāTe maiñ shab-ḳhūñ maar kar

is tarah yalġhār kartī haiñ ki jaise maiñ nihattā huuñ

mire tarkash ke tiir

mere hī siine meñ haiñ paivast

maiñ zinda nahīñ

zinda nahīñ

2

dekh ai chashm-e-ḳhayāl

saar ke tāroñ pe iThlātī huī vo jū-e-naġhma bū-e-gul

vo urūs-e-ārzū vo chāñdnī ke pairahan meñ husn-e-raqsāñ mauj-e-mai

vo bahāroñ kā tabassum vo javānī kā ġhurūr

titliyoñ kī ḳhāmushī gungunātī rāgnī

aa rahī hai merī jānib haath phailā.e hue

husn jis ke loch se hai sañg-e-marmar meñ gudāz

husn jis ke ruup se aahan huā ā.īna-sāz

husn añgḌā.ī meñ jis kī saikḌoñ qaumoñ kā raaz

husn jis ke abrūoñ kā jalva mehrāb-e-namāz

husn jis kā ras-bharā siina hazāroñ gumbadoñ par sarfarāz

kyā huā vo husn vo doshīza vo mere

ḳhayāloñ kī dulhan

kho ga.ī apnī numū ke parda-e-rañgīñ ke pīchhe kho ga.ī

vaqt ke sahrā meñ aivānoñ kī azmat sañg-sāzoñ kī tarāsh

hajla-e-sīmīñ kī ra.anā.ī kā afsūñ ho ga.ī

husn patthar ban gayā fan kī ragoñ kā garm ḳhuuñ

murda sadiyoñ ke shabistānoñ meñ apnī aarzū se jī uThā

aur sūraj kī tarah raushan huā

din Dhale tak merī āñkhoñ meñ rahā biitī huī sadiyoñ kā nuur

merā sarmāya thā sūraj kī mohabbat kā fusūñ

mere hoñToñ par tarāne the ki mere zehn meñ

giit ban ban kar ubhartā thā fazāoñ kā sukūt

yādeñ phūloñ kī tarah

dil ke har goshe ko mahkātī thiiñ aur mere ḳhayāl

shaam tak

aaj kī shab kī tamannā meñ rahe

nīm-shab kī sard tārīkī meñ ye maazī ke bhuut

nāchte haiñ har taraf

jaise ye ik aur duniyā se dar aate haiñ yahāñ

jaise maiñ un dushmanoñ meñ ghir gayā huuñ jin kī bhuuk

mere ḳhuuñ se bujh ga.ī to bujh ga.ī

ḳhushk haiñ lab dam nikaltā jā hai dam-ba-dam

be-hisī chhā.e chalī jaatī hai ab maiñ kyā karūñ

kyā karūñ

vaqt ke sahrā kā ik zarra huuñ maiñ

biitī sadiyoñ ne jise paalā magar

aaj maiñ huuñ un kī āñkhoñ vo ḳhaar

jis ko us sahrā pe koī haq nahīñ

kaash vaqt

vus.at-e-sahrā meñ laa.e bahr-e-jaulāñ kā ḳharosh

aur maiñ apne maazī kī murād

TuuT kar ik aur hī sahrā kā maazī ban sakūñ

waqt ko sahra kahun ya bahr-e-be-sahil kahun

raat hai reg-e-rawan ki lahr ya ki mauj-e-ab-e-zindagi

tare jugnu hain ki moti phul hain ya sipiyan

kahkashan hai dhul taron ki ki mauj-e-pur-KHarosh-o-dur-fashan

soch ki chingariyan uDti hain yun

jaise dil par choT paDti ho kisi ehsas ki

jaise main tanha nahin

waqt ke sahra mein jaise an-ginat sae ubhar kar meri jaanib

dauDte aate hun

sae

biti sadiyan jaise par phailae uThin gol gol

apni lashen chhoD kar meri taraf aain

ki jaise noch khaengi mujhe

aur phir murda lashen yak-ba-yak wahshi bagulon ki tarah

raqs karti chaar-su

Dhol-tashon aur naqqaron ki haibat-nak aawazon pe raqs

khaDkhaDati haDDiyan KHud shoale ban kar nachti hain chaar-su

aur ek zartusht sajda rez ho kar

un ki haibat un ki azmat un ki be-rahmi ko karta ho salam

aur wo

us ko apni gul-fishan aaghosh mein le kar uThin

jaise man

apne bachche ko uThae

aur main

waqt ke be-rahm hathon mein hon jaise gidh ke changul mein koi zinda parind

biti sadiyan shab ke sannaTe main shab-KHun mar kar

is tarah yalghaar karti hain ki jaise main nihatta hun

mere tarkash ke tir

mere hi sine mein hain paiwast

main zinda nahin

zinda nahin

2

dekh ai chashm-e-KHayal

sar ke taron pe iThlati hui wo ju-e-naghma bu-e-gul

wo urus-e-arzu wo chandni ke pairahan mein husn-e-raqsan mauj-e-mai

wo bahaaron ka tabassum wo jawani ka ghurur

titliyon ki KHamushi gungunati ragni

aa rahi hai meri jaanib hath phailae hue

husn jis ke loch se hai sang-e-marmar mein gudaz

husn jis ke rup se aahan hua aaina-saz

husn angDai mein jis ki saikDon qaumon ka raaz

husn jis ke abruon ka jalwa mehrab-e-namaz

husn jis ka ras-bhara sina hazaron gumbadon par sarfaraaz

kya hua wo husn wo doshiza wo mere

KHayalon ki dulhan

kho gai apni numu ke parda-e-rangin ke pichhe kho gai

waqt ke sahra mein aiwanon ki azmat sang-sazon ki tarash

hajla-e-simin ki ranai ka afsun ho gai

husn patthar ban gaya fan ki ragon ka garm KHun

murda sadiyon ke shabistanon mein apni aarzu se ji uTha

aur suraj ki tarah raushan hua

din Dhale tak meri aankhon mein raha biti hui sadiyon ka nur

mera sarmaya tha suraj ki mohabbat ka fusun

mere honTon par tarane the ki mere zehn mein

git ban ban kar ubharta tha fazaon ka sukut

yaaden phulon ki tarah

dil ke har goshe ko mahkati thin aur mere KHayal

sham tak

aaj ki shab ki tamanna mein rahe

nim-shab ki sard tariki mein ye mazi ke bhut

nachte hain har taraf

jaise ye ek aur duniya se dar aate hain yahan

jaise main un dushmanon mein ghir gaya hun jin ki bhuk

mere KHun se bujh gai to bujh gai

KHushk hain lab dam nikalta ja hai dam-ba-dam

be-hisi chhae chali jati hai ab main kya karun

kya karun

waqt ke sahra ka ek zarra hun main

biti sadiyon ne jise pala magar

aaj main hun un ki aankhon wo KHar

jis ko us sahra pe koi haq nahin

kash waqt

wusat-e-sahra mein lae bahr-e-jaulan ka KHarosh

aur main apne mazi ki murad

TuT kar ek aur hi sahra ka mazi ban sakun