mazdur

shāhid-e-dahr kī tasvīr banāne vaale

apnī tasvīr kī jānib bhī zarā ek nazar

ai har ik zarre kī taqdīr banāne vaale

apnī taqdīr ke ḳhākoñ ko farāmosh na kar

terī taqdīr hai ā.īna-e-taqdīr jahāñ

ḳhuub ma.alūm hai terā ġham-e-tanhā mujh ko

tujh meñ uThne ke nishāñ tujh meñ sambhalne ke nishāñ

terī sūrat meñ nazar aatā hai fardā mujh ko

muntashir ho ke zamāne meñ huā ḳhār-o-zabūñ

ho munazzam to qavī tujh sā zamāne meñ nahīñ

an-ginat haath tire jab bhī uThe haiñ mil kar

tere qadmoñ pe jhukī aa ke chaTānoñ kī jabīñ

ḳhāliq-e-nān-e-javīñ tū hai ziyāñ terī hai

fikr kī baat nahīñ saarā jahāñ terā hai

quvvateñ tujh meñ jo haiñ un kī ḳhabar tujh ko nahīñ

jo ayaañ hai vo tirā hai jo hai nihāñ terā hai

ġham ko siine meñ dabā rakkhā hai tū ne lekin

ġham baḌī chiiz hai to us se koī kaam to le

tishnagī baḌh ke kahīñ terā galā ghoñT na de

mai bhī mil jā.egī saaqī se magar jaam to le

shahid-e-dahr ki taswir banane wale

apni taswir ki jaanib bhi zara ek nazar

ai har ek zarre ki taqdir banane wale

apni taqdir ke KHakon ko faramosh na kar

teri taqdir hai aaina-e-taqdir jahan

KHub malum hai tera gham-e-tanha mujh ko

tujh mein uThne ke nishan tujh mein sambhalne ke nishan

teri surat mein nazar aata hai farda mujh ko

muntashir ho ke zamane mein hua KHar-o-zabun

ho munazzam to qawi tujh sa zamane mein nahin

an-ginat hath tere jab bhi uThe hain mil kar

tere qadmon pe jhuki aa ke chaTanon ki jabin

KHaliq-e-nan-e-jawin tu hai ziyan teri hai

fikr ki baat nahin sara jahan tera hai

quwwaten tujh mein jo hain un ki KHabar tujh ko nahin

jo ayan hai wo tera hai jo hai nihan tera hai

gham ko sine mein daba rakkha hai tu ne lekin

gham baDi chiz hai to us se koi kaam to le

tishnagi baDh ke kahin tera gala ghonT na de

mai bhi mil jaegi saqi se magar jam to le