la-yaKHul

1

mirī ḳhalvat ke haale meñ tumhārā ye tilsmātī badan

ik nuur meñ Duubā huā bahtā huā dhārā

ye madh-mātā ye ḳhud ko sar-ba-sar bhūlā huā

behad nirālā an-chhuā saayā

havā ke narm so.e so.e lahje kī tarah mas ho ke

merī ruuh meñ ātish kā bhaḌkātā huā saayā

ye saayā raushnī hī raushnī hai sar se paañv tak

ye saayā zindagī hī zindagī hai sar se paañv tak

ye vasl-e-tām kā lamha vo lamha hai

ki jab ḳhud vaqt ruk jaatā hai

jaise shaam ko dariyā bhī ruk kar ḳhud farāmoshī ke gahre saañs lete haiñ

2

udhar jab vaqt kā sayyāl dhārā

ek do lamhoñ ko ruktā hai

na jaane kyuuñ mire andar lahū kā tez-tar ho kar

harīm-e-dil kī dīvāroñ se apnā sar paTaktā hai

ye pīr-e-rome ke marqad pe raqsāñ

un ḳhudā-āgāh durveshoñ kī sūrat raqs kartā hai

jinheñ ḳhud apne tan-man kī koī sudh-budh nahīñ rahtī

vo sar-tā-pā faqat rūh-e-tām kī tamsīl lagte haiñ

kisī aise abad lamhe meñ jism-o-jāñ kī is vahdat kā koī naam to hogā

sarāpā raqs kī us hālat-e-be-nām kā anjām to hogā

tumhī bolo ki us kā naam kyā anjām kyā hai

haañ tumhī bolo girah kholo

1

meri KHalwat ke haale mein tumhaara ye tilsmati badan

ek nur mein Duba hua bahta hua dhaara

ye madh-mata ye KHud ko sar-ba-sar bhula hua

behad nirala an-chhua saya

hawa ke narm soe soe lahje ki tarah mas ho ke

meri ruh mein aatish ka bhaDkata hua saya

ye saya raushni hi raushni hai sar se panw tak

ye saya zindagi hi zindagi hai sar se panw tak

ye wasl-e-tam ka lamha wo lamha hai

ki jab KHud waqt ruk jata hai

jaise sham ko dariya bhi ruk kar KHud faramoshi ke gahre sans lete hain

2

udhar jab waqt ka sayyal dhaara

ek do lamhon ko rukta hai

na jaane kyun mere andar lahu ka tez-tar ho kar

harim-e-dil ki diwaron se apna sar paTakta hai

ye pir-e-rome ke marqad pe raqsan

un KHuda-agah durweshon ki surat raqs karta hai

jinhen KHud apne tan-man ki koi sudh-budh nahin rahti

wo sar-ta-pa faqat ruh-e-tam ki tamsil lagte hain

kisi aise abad lamhe mein jism-o-jaan ki is wahdat ka koi nam to hoga

sarapa raqs ki us haalat-e-be-nam ka anjam to hoga

tumhi bolo ki us ka nam kya anjam kya hai

han tumhi bolo girah kholo