16 december armi public school par hamla

merā bachcha rāham jab schōl se lauTā

maiñ ne us se basta apne haath le kar us se pūchhā

itnā bhārī kyuuñ hai basta

tiin kitābeñ le kar tum schōl ga.e the

ik paanī kī botal thī aur lunch box thā

itnā bhārī kyuuñ hai basta

bolā baabā maiñ kyā bolūñ

rose to ye halkā hotā hai

aaj na jaane bhārī kyuuñ hai

mujh ko kuchh tashvīsh huī to

maiñ ne us kā basta kholā

khol ke dekhā

tiin kitābeñ nahīñ thiiñ us meñ chhe thiiñ

paanī kī botal bhī ek nahīñ thī

do do thiiñ

lunch box bhī do the lekin ek hī jaise

rāham kā kuchh ḳhālī thā par dūsrā puurā bharā huā thā

sochā kaise ho saktā hai

ye to rāham kā basta hai

ik baste meñ saarī chīzeñ do do kyuuñ haiñ

ek dam mujh ko yaad aayā ki

kal schōl ke chhalnī bachchoñ meñ ik bachcha

rāham jitnī umr kā bhī thā

bilkul rāham ke jaisā thā

rāham jaisā hī basta thā

paanī botal bhī vaisī

lunch box kā color vahī thā

vo bhī merā hī bachcha thā

vo bhī kal schōl gayā thā

aaj us ne schōl kī chhuTTī kar lī hai

ab vo chhuTTī par hī rahegā

us kā basta roz uThā kar

merā bachcha ghar aa.egā

mera bachcha raham jab school se lauTa

main ne us se basta apne hath le kar us se puchha

itna bhaari kyun hai basta

tin kitaben le kar tum school gae the

ek pani ki botal thi aur lunch box tha

itna bhaari kyun hai basta

bola baba main kya bolun

rose to ye halka hota hai

aaj na jaane bhaari kyun hai

mujh ko kuchh tashwish hui to

main ne us ka basta khola

khol ke dekha

tin kitaben nahin thin us mein chhe thin

pani ki botal bhi ek nahin thi

do do thin

lunch box bhi do the lekin ek hi jaise

raham ka kuchh KHali tha par dusra pura bhara hua tha

socha kaise ho sakta hai

ye to raham ka basta hai

ek baste mein sari chizen do do kyun hain

ek dam mujh ko yaad aaya ki

kal school ke chhalni bachchon mein ek bachcha

raham jitni umr ka bhi tha

bilkul raham ke jaisa tha

raham jaisa hi basta tha

pani botal bhi waisi

lunch box ka color wahi tha

wo bhi mera hi bachcha tha

wo bhi kal school gaya tha

aaj us ne school ki chhuTTi kar li hai

ab wo chhuTTi par hi rahega

us ka basta roz uTha kar

mera bachcha ghar aaega