apni apni raushni

vaise us tārīk jañgal ke safar ke qabl bhī

haath meñ us ke

yahī ik TimTimātā kāñptā nanhā diyā thā

kuchh to shohrat kī havas ne

aur kuchh ahmaq bahī-ḳhvāhoñ ne

is kī sāda-lauhī ko sazā dī

us ke tiflāna irāda ko havā dī

lā ke sarhad par ḳhudā-hāfiz kahā

us ke ḳhizāb-ālūda sar ko ye sa.ādat dī

dhuāñ khaa.ī huī

bad-rañg dastār-e-qayādat dī

to vo siina phulā.e

apnī dastār-e-qayāmat ko sambhāle

kāñpte nanhe diye ko

ek mash.al kī tarah ūñchā uThā.e

chal paḌā thā

ġhāliban vo do-qadam hī jā sakā hogā

ki piilī āñdhiyoñ ne

dast-e-larzāñ meñ larazte us diye ko

naza.a kī hichkī atā kī

us pe terā

chhīn lī dastār us kī

us ne āġhāz-e-safar kī saarī ḳhush-fahmī

bikhartī dekh kar

jab lauTnā chāhā

to ye mumkin nahīñ thā

har taraf tārīkiyāñ thiiñ

daf.atan kuchh duur pīchhe

us ne dekhā

āsmāñ se baat kartī dhuul kī dīvār

baḌhtī aa rahī hai

aur kuchh qurbat huī to us ne dekhā

vo ka.ī the

un ke hāthoñ meñ bhaḌaktī mish.aleñ thiiñ

kāsa-e-namnāk se us ne

ġharaz kī gandagī

jo us ko fitrat meñ milī thī

poñchh Daalī

aur fauran ġhāza-e-māsūm

ye us kī aadat ban chukī thī

apne chehre par chaḌhāyā

ek hī maqsad thā ya.anī

dhuul uḌāte qāfile se

ek mash.al le sake vo

ġhāza-e-māsūmiyat phir kaam aayā

qāfila vāloñ ne us ko

ek mash.al de ke

apne saath chalne ko kahā

lekin kahāñ tak

vo nihāyat tez-rau aur yak-qadam the

us ke naaz paaoñ

sūkhī haDDiyoñ ke zor par kyā saath dete

ek qadam yā do-qadam

phir thak gayā vo

rafta rafta

us kī vo māñgī huī mash.al

ḳhud apne rañg-o-roġhan khā rahī thī

ab faqat bheñchī huī mohtāt muTThī meñ

añdhere kī chhaḌī thī

bād-o-bārāñ tez tūfāñ

zehn-e-tiflak meñ safar ke qabl

un dushvāriyoñ kā

ek halkā sā tasavvur bhī nahīñ thā

ab jo ye bar-aks sūrat ho ga.ī thī

ro paḌā vo

us kī paspā.ī meñ lekin hausla thā

dāman-e-ummīd ab bhī haath meñ thā

daf.atan us ne ye dekhā

dhundlī gahrī raushniyoñ ke ka.ī hāloñ meñ

kuchh baḌhte qadam nazdīk hote jā rahe the

un ke hoñToñ se ḳhamoshī chhin rahī thī

sust-rau the

phir bhī un kī chaal meñ ik tamkanat thī

us ne sochā

un na.e logoñ kī tarah tez nahīñ hai

un kī hamrāhī meñ

qadmoñ kī naqāhat be-asar hai

aur manzil ek sa.ī-e-muḳhtasar hai

ik na.ī ummīd le kar

pusht par murda diye tārīk mash.al ko chhupā kar

guftugū meñ maslahat aamez narmī ghol kar

us ne na.e logoñ se ik mash.al talab kī

uf vo kaisā qāfila thā

kis tilsmātī jahāñ ke log the vo

is qadar tārīk rāhoñ meñ

baḌī hī tamkanat se chal rahe the

aur hāthoñ meñ koī mash.al nahīñ thī

raushnī thī

un kī āñkhoñ ke darīchoñ se utar kar

apne qadmoñ se lipaT kar chalne vaalī

apnī apnī raushnī thī

us ne sochā

un ke qadmoñ se lipaT kar chalne vaalī

dhīmī dhīmī raushnī ke aks

kyā us ke liye kaafī nahīñ haiñ

aaj bhī vo

pusht par murda diyā tārīk mash.al ko chhupā.e

un na.e logoñ ke pīchhe

un ke qadmoñ meñ laraztī raushniyoñ ke sahāre

Thokareñ khātā sambhaltā sochtā hai

raushnī to ḳhārjī shai hai

diyā hai

yā bhaḌaktī mish.aleñ haiñ

āḳhirash ye raushnī

un ajnabī logoñ kī āñkhoñ se utar kar

un ke qadmoñ se lipaT kar

chalne vaalī raushnī kaisī hai

kaisī raushnī hai

waise us tarik jangal ke safar ke qabl bhi

hath mein us ke

yahi ek TimTimata kanpta nanha diya tha

kuchh to shohrat ki hawas ne

aur kuchh ahmaq bahi-KHwahon ne

is ki sada-lauhi ko saza di

us ke tiflana irada ko hawa di

la ke sarhad par KHuda-hafiz kaha

us ke KHizab-aluda sar ko ye saadat di

dhuan khai hui

bad-rang dastar-e-qayaadat di

to wo sina phulae

apni dastar-e-qayamat ko sambhaale

kanpte nanhe diye ko

ek mashal ki tarah uncha uThae

chal paDa tha

ghaaliban wo do-qadam hi ja saka hoga

ki pili aandhiyon ne

dast-e-larzan mein larazte us diye ko

naza ki hichki ata ki

us pe tera

chhin li dastar us ki

us ne aaghaz-e-safar ki sari KHush-fahmi

bikharti dekh kar

jab lauTna chaha

to ye mumkin nahin tha

har taraf tarikiyan thin

dafatan kuchh dur pichhe

us ne dekha

aasman se baat karti dhul ki diwar

baDhti aa rahi hai

aur kuchh qurbat hui to us ne dekha

wo kai the

un ke hathon mein bhaDakti mishalen thin

kasa-e-namnak se us ne

gharaz ki gandagi

jo us ko fitrat mein mili thi

ponchh Dali

aur fauran ghaza-e-masum

ye us ki aadat ban chuki thi

apne chehre par chaDhaya

ek hi maqsad tha yani

dhul uDate qafile se

ek mashal le sake wo

ghaza-e-masumiyat phir kaam aaya

qafila walon ne us ko

ek mashal de ke

apne sath chalne ko kaha

lekin kahan tak

wo nihayat tez-rau aur yak-qadam the

us ke naz paon

sukhi haDDiyon ke zor par kya sath dete

ek qadam ya do-qadam

phir thak gaya wo

rafta rafta

us ki wo mangi hui mashal

KHud apne rang-o-roghan kha rahi thi

ab faqat bhenchi hui mohtat muTThi mein

andhere ki chhaDi thi

baad-o-baran tez tufan

zehn-e-tiflak mein safar ke qabl

un dushwariyon ka

ek halka sa tasawwur bhi nahin tha

ab jo ye bar-aks surat ho gai thi

ro paDa wo

us ki paspai mein lekin hausla tha

daman-e-ummid ab bhi hath mein tha

dafatan us ne ye dekha

dhundli gahri raushniyon ke kai haalon mein

kuchh baDhte qadam nazdik hote ja rahe the

un ke honTon se KHamoshi chhin rahi thi

sust-rau the

phir bhi un ki chaal mein ek tamkanat thi

us ne socha

un nae logon ki tarah tez nahin hai

un ki hamrahi mein

qadmon ki naqahat be-asar hai

aur manzil ek sai-e-muKHtasar hai

ek nai ummid le kar

pusht par murda diye tarik mashal ko chhupa kar

guftugu mein maslahat aamez narmi ghol kar

us ne nae logon se ek mashal talab ki

uf wo kaisa qafila tha

kis tilsmati jahan ke log the wo

is qadar tarik rahon mein

baDi hi tamkanat se chal rahe the

aur hathon mein koi mashal nahin thi

raushni thi

un ki aankhon ke darichon se utar kar

apne qadmon se lipaT kar chalne wali

apni apni raushni thi

us ne socha

un ke qadmon se lipaT kar chalne wali

dhimi dhimi raushni ke aks

kya us ke liye kafi nahin hain

aaj bhi wo

pusht par murda diya tarik mashal ko chhupae

un nae logon ke pichhe

un ke qadmon mein larazti raushniyon ke sahaare

Thokaren khata sambhalta sochta hai

raushni to KHarji shai hai

diya hai

ya bhaDakti mishalen hain

aaKHirash ye raushni

un ajnabi logon ki aankhon se utar kar

un ke qadmon se lipaT kar

chalne wali raushni kaisi hai

kaisi raushni hai