asa-ba-dast ab nahin hai koi

israel misr jañg meñ colonel nāsir ke na.are

ham beTe fir.aun ke se muta.assir ho kar

yahī vo kohsār haiñ jahāñ

musht-e-ḳhāk nūr-āshnā huī thī

yahī vo zarrāt-e-reg haiñ

jo kisī ke betāb vālihāna qadam

kī Thokar se

kahkashāñ kahkashāñ hue the

yahī vo pathrīlī vādiyāñ haiñ

ki jin kī āġhosh-e-ḳhushk meñ

do dhaḌakte ma.asūm dil mile the

aur aaj har-sū

hai dūd-e-bārūd kī ridā

jis meñ har kiran raushnī kī

mādūm ho ga.ī hai

ujaaḌ sañgīn vādiyoñ meñ

havas kā ifrīt

gosfandān-e-arz-e-madyan ko

khā gayā hai

na koī bint-e-sho.aib hai

aur na rahrav-e-tishna hī hai koī

kueñ ke paas meñ

jauharī zahr ghul gayā hai

tajallī-e-lam-yazal kahāñ kī

ye tez sañgīnoñ kī chamak hai

kalīm hī jab nahīñ hai koī

kalām kaisā

muhīb topoñ kī ye dhamak hai

kisī ke ma.asūm vālihāna qadam kī

ye kahkashāñ nahīñ hai

ye reg-hā-e-zamīn hī haiñ

jo āhanī aslahoñ kī ātish meñ tap ga.e haiñ

savād-e-sāhil

asā-ba-dast ab nahīñ hai koī

to mo.ajiza kyā tilism kaisā

ye sat.h-e-dariyā-e-nīl gul-gū jo ho ga.ī hai

asā kā e.ajāz to nahīñ

ye ridā-e-ḳhūñ hai ridā-e-ḳhūñ hai

ye ḳhuun kis kā hai

ai dil-e-zūd-ranj to kyuuñ udaas hai

ḳhair-o-shar kī ye kashmakash nahīñ hai

ki donoñ jānib hī

āstīn-e-havas meñ

fir.auniyat ke zahrīle azhdahe haiñ

savād-e-sāhil

asā-ba-dast ab nahīñ hai koī

israel misr jang mein colonel nasir ke nare

hum beTe firaun ke se mutassir ho kar

yahi wo kohsar hain jahan

musht-e-KHak nur-ashna hui thi

yahi wo zarraat-e-reg hain

jo kisi ke betab walihana qadam

ki Thokar se

kahkashan kahkashan hue the

yahi wo pathrili wadiyan hain

ki jin ki aaghosh-e-KHushk mein

do dhaDakte masum dil mile the

aur aaj har-su

hai dud-e-barud ki rida

jis mein har kiran raushni ki

madum ho gai hai

ujaD sangin wadiyon mein

hawas ka ifrit

gosfandan-e-arz-e-madyan ko

kha gaya hai

na koi bint-e-shoaib hai

aur na rahraw-e-tishna hi hai koi

kuen ke pas mein

jauhari zahr ghul gaya hai

tajalli-e-lam-yazal kahan ki

ye tez sanginon ki chamak hai

kalim hi jab nahin hai koi

kalam kaisa

muhib topon ki ye dhamak hai

kisi ke masum walihana qadam ki

ye kahkashan nahin hai

ye reg-ha-e-zamin hi hain

jo aahani aslahon ki aatish mein tap gae hain

sawad-e-sahil

asa-ba-dast ab nahin hai koi

to moajiza kya tilism kaisa

ye sath-e-dariya-e-nil gul-gu jo ho gai hai

asa ka eajaz to nahin

ye rida-e-KHun hai rida-e-KHun hai

ye KHun kis ka hai

ai dil-e-zud-ranj to kyun udas hai

KHair-o-shar ki ye kashmakash nahin hai

ki donon jaanib hi

aastin-e-hawas mein

firauniyat ke zahrile azhdahe hain

sawad-e-sahil

asa-ba-dast ab nahin hai koi