makin hi ajib hain

ye ghar bahut aziim thā

ye ghar bahut hasīn thā

ki us ke ird-gird duur duur tak

koī makān us se baḌh ke thā nahīñ

magar yahāñ kā chakh ajab rivāj thā

the bin-bulā.e ajnabī

ki jin kā ghar pe raaj thā

saje sajā.e kamre un ke shab-kade

vo sabz lawn phuul kī kiyāriyāñ

vasī.a sahn-o-sā.ibāñ

the un ke vāste magar

ḳhud apne ghar meñ ajnabī

makīn chaukhaToñ pe

rāteñ apnī kāTte rahe

saḌak galī kī ḳhaak chhānte rahe

vo bin-bulā.e ajnabī

gadele bistaraoñ pe

lazzat-e-shab-o-sahar meñ mast mast the

usī tarah na jaane kitnī umr kāTne ke ba.ad

rafta rafta

saḳht-o-sard chaukhaToñ ne

narm-o-garm bistaraoñ kī gudgudī

kā zā.iqa samajh liyā

dimāġh-o-dil kī ḳhushk vādiyoñ meñ

aarzū ke ābshār gungunā uThe

siyāh-baḳht raat

shu.ūr ke junūn-e-shauq ke charāġh jal ga.e

charāġh se ka.ī charāġh jal ga.e

ba-yak zabān

chaukhaToñ se ye mutālba huā

ki ajnabī hamāre ghar ko chhoḌ deñ

ye ghar hamāre ḳhuun

aur hamārī haDDiyoñ se hai

ye baat sun ke shab-kade laraz ga.e

thī chauñkne kī baat hī

ki sāl-ḳhūrda andhī chaukhaToñ pe

raushnī kahāñ se aa ga.ī

galī kī ḳhaak

āsmāñ pe abr ban ke chhā ga.ī

kahāñ se zehn-e-nā-rasā meñ

baat aisī aa ga.ī

vo ajnabī

navāzishoñ ināyatoñ se

un kā josh sard jab na kar sake

to nit-na.ī sazāoñ aur dhamkīyoñ

galī galī lahū lahū

saḌak saḌak dhuāñ dhuāñ

magar junūn-e-shauq kī sadā

zamīñ se āsmāñ

sazā.eñ saḳht thiiñ magar

mutālba aziiz thā

navāzisheñ ināyateñ

sazā.eñ aur dhamkiyāñ

sadā-e-haq junūn-e-shauq dāmanoñ kī dhajjiyāñ

muqābla bhī ḳhuub thā

kahāñ zamīn-e-hirs

aur kahāñ junūñ kā āsmāñ

ma.āl-e-kashmakash vahī huā

jo honā chāhiye

vo ajnabī chale ga.e

makīn apne ghar ko pā ke

apne ghar ko pā ke

apne ghar meñ aa ga.e

vo ghar ke jis ke vāste

lagā dī apnī jaan bhī

jo mil gayā to yuuñ huā

ki jaise kuchh nahīñ huā

ajiib mājrā hai ab

junūn-e-ishq ne charāġh-e-ārzū jalā.e the

usī kī tez lau se ye makīn

apne ghar ko shauq se jalā rahe haiñ

sabz lawn meñ kyāriyoñ ke phuul

apne paañv se kuchh rahe haiñ

sā.ebān ke sutūn Dhā rahe haiñ

al-ġharaz

jo aaj ghar kā haal hai

hamāre paas lafz hī nahīñ

ki ham bayāñ kareñ

jo sach kaho to aaj bhī

ye ghar bahut hasīn hai

makīn hī ajiib haiñ

baḌe hī bad-nasīb haiñ

ye ghar bahut azim tha

ye ghar bahut hasin tha

ki us ke ird-gird dur dur tak

koi makan us se baDh ke tha nahin

magar yahan ka chakh ajab riwaj tha

the bin-bulae ajnabi

ki jin ka ghar pe raj tha

saje sajae kamre un ke shab-kade

wo sabz lawn phul ki kiyariyan

wasia sahn-o-saiban

the un ke waste magar

KHud apne ghar mein ajnabi

makin chaukhaTon pe

raaten apni kaTte rahe

saDak gali ki KHak chhante rahe

wo bin-bulae ajnabi

gadele bistaraon pe

lazzat-e-shab-o-sahar mein mast mast the

usi tarah na jaane kitni umr kaTne ke baad

rafta rafta

saKHt-o-sard chaukhaTon ne

narm-o-garm bistaraon ki gudgudi

ka zaiqa samajh liya

dimagh-o-dil ki KHushk wadiyon mein

aarzu ke aabshaar gunguna uThe

siyah-baKHt raat

shuur ke junun-e-shauq ke charagh jal gae

charagh se kai charagh jal gae

ba-yak zaban

chaukhaTon se ye mutalba hua

ki ajnabi hamare ghar ko chhoD den

ye ghar hamare KHun

aur hamari haDDiyon se hai

ye baat sun ke shab-kade laraz gae

thi chaunkne ki baat hi

ki sal-KHurda andhi chaukhaTon pe

raushni kahan se aa gai

gali ki KHak

aasman pe abr ban ke chha gai

kahan se zehn-e-na-rasa mein

baat aisi aa gai

wo ajnabi

nawazishon inayaton se

un ka josh sard jab na kar sake

to nit-nai sazaon aur dhamkiyon

gali gali lahu lahu

saDak saDak dhuan dhuan

magar junun-e-shauq ki sada

zamin se aasman

sazaen saKHt thin magar

mutalba aziz tha

nawazishen inayaten

sazaen aur dhamkiyan

sada-e-haq junun-e-shauq damanon ki dhajjiyan

muqabla bhi KHub tha

kahan zamin-e-hirs

aur kahan junun ka aasman

maal-e-kashmakash wahi hua

jo hona chahiye

wo ajnabi chale gae

makin apne ghar ko pa ke

apne ghar ko pa ke

apne ghar mein aa gae

wo ghar ke jis ke waste

laga di apni jaan bhi

jo mil gaya to yun hua

ki jaise kuchh nahin hua

ajib majra hai ab

junun-e-ishq ne charagh-e-arzu jalae the

usi ki tez lau se ye makin

apne ghar ko shauq se jala rahe hain

sabz lawn mein kyariyon ke phul

apne panw se kuchh rahe hain

saeban ke sutun Dha rahe hain

al-gharaz

jo aaj ghar ka haal hai

hamare pas lafz hi nahin

ki hum bayan karen

jo sach kaho to aaj bhi

ye ghar bahut hasin hai

makin hi ajib hain

baDe hi bad-nasib hain