wo jis ka intizar tha

vo jis kā intizār thā

shafaq ko

bādaloñ ko

rahguzar ko ābshār ko

ḳhizāñ kī pattiyoñ ko

chāñdnī ko

dhuup ko bahār ko

vo jis kī aarzū thī

sā.atoñ ko

ḳhāmushī ko

zehn ko ḳhayāl ko

tasavvur-e-muhāl ko

khanaktī pyāliyoñ ko

kursiyoñ ko

jām-e-mai ko sham-e-nā-tamām ko

dopahar ko shaam ko

vo jis kī āhaTeñ

samā.atoñ ke kunj meñ nihāñ thiiñ

jis kā aks

jalva-rez thā

basāratoñ kī jhiil meñ

vo kyā faqat sabā kā surmagīñ ḳhirām thā

ki shāḳh-e-gul kā sāya-e-ḳhafīf thā

ki mauj-e-āb par kiran kā irti.āsh thā

jo ek pal meñ sāmne se yuuñ guzar gayā

ki vo sabhī jo muntazir the

aañkh milte rah ga.e

magar vo is tarah guzar gayā

ki yak-ba-yak

vo intizār kī bisāt hī ulaT ga.ī

vo khel ḳhatm ho gayā

aur us ke ba.ad

āsmān se zamīñ

zamīñ se āsmāñ tak

ḳhalā ḳhalā ḳhalā ḳhalā

wo jis ka intizar tha

shafaq ko

baadalon ko

rahguzar ko aabshaar ko

KHizan ki pattiyon ko

chandni ko

dhup ko bahaar ko

wo jis ki aarzu thi

saaton ko

KHamushi ko

zehn ko KHayal ko

tasawwur-e-muhaal ko

khanakti pyaliyon ko

kursiyon ko

jam-e-mai ko sham-e-na-tamam ko

dopahar ko sham ko

wo jis ki aahaTen

samaaton ke kunj mein nihan thin

jis ka aks

jalwa-rez tha

basaraton ki jhil mein

wo kya faqat saba ka surmagin KHiram tha

ki shaKH-e-gul ka saya-e-KHafif tha

ki mauj-e-ab par kiran ka irtiash tha

jo ek pal mein samne se yun guzar gaya

ki wo sabhi jo muntazir the

aankh milte rah gae

magar wo is tarah guzar gaya

ki yak-ba-yak

wo intizar ki bisat hi ulaT gai

wo khel KHatm ho gaya

aur us ke baad

aasman se zamin

zamin se aasman tak

KHala KHala KHala KHala