2 qahqaha

ajab raat hai hadd-e-nigāh tak har-sū

athāh zahar bharī chāñdnī kī jhiil sī hai

varā-e-madd-e-nazar kohar hai taḳhayyul kī

varā-e-hadd-e-taḳhayyul siyah fasīl sī hai

samāñ hai hū kā saḌak hai saḌak ke dono taraf

qatār tā-ba-ufuq hai ghane daraḳhtoñ kī

havā sanaktī hai to chauñk chauñk paḌtī haiñ

har ek peḌ meñ rūheñ sī tīra-baḳhtoñ kī

kuchh aise ghuur ke bas gholte haiñ sannāTe

havā ke zor se jab Tahniyāñ ulajhtī haiñ

dhueñ se reñgte haiñ tah-ba-tah ḳhayāloñ meñ

sukūt chīḳhtā hai sīTiyāñ sī bajtī haiñ

nazar uThātā huuñ to zāviye nigāhoñ meñ

uThā ke dhuul sarāboñ kī jhoñk dete haiñ

qadam baḌhātā huuñ to azhdahe hayūloñ ke

phanoñ ke tiir kaf-e-pā meñ Thoñk dete haiñ

jo saañs letā huuñ to saañs saañs kī lau par

tafakkurāt kī āñdhī sī chalne lagtī hai

jo sochtā huuñ to ehsās ke mahlakoñ tak

siyāhiyoñ kī ġhalāzat uchhalne lagtī hai

dil-o-nigāh pe kitnī muhīb tezī se

kuchh uljhanoñ ke siyah-nāg reñg aa.e haiñ

qadam qadam pe hai kitnī amīq-e-fikr kī lau

qadam qadam pe mirī rah meñ kitne saa.e haiñ

matā-e-zīst marī laakh hech-māyā sahī

magar sitāre falak ke na jaane kyuuñ yūñhī

udaas udaas nigāhoñ se mujh ko takte haiñ

bhalā ye saa.e mirī raah rok sakte haiñ

ajab raat hai hadd-e-nigah tak har-su

athah zahar bhari chandni ki jhil si hai

wara-e-madd-e-nazar kohar hai taKHayyul ki

wara-e-hadd-e-taKHayyul siyah fasil si hai

saman hai hu ka saDak hai saDak ke dono taraf

qatar ta-ba-ufuq hai ghane daraKHton ki

hawa sanakti hai to chaunk chaunk paDti hain

har ek peD mein ruhen si tira-baKHton ki

kuchh aise ghur ke bas gholte hain sannaTe

hawa ke zor se jab Tahniyan ulajhti hain

dhuen se rengte hain tah-ba-tah KHayalon mein

sukut chiKHta hai siTiyan si bajti hain

nazar uThata hun to zawiye nigahon mein

uTha ke dhul sarabon ki jhonk dete hain

qadam baDhata hun to azhdahe hayulon ke

phanon ke tir kaf-e-pa mein Thonk dete hain

jo sans leta hun to sans sans ki lau par

tafakkuraat ki aandhi si chalne lagti hai

jo sochta hun to ehsas ke mahlakon tak

siyahiyon ki ghalazat uchhalne lagti hai

dil-o-nigah pe kitni muhib tezi se

kuchh uljhanon ke siyah-nag reng aae hain

qadam qadam pe hai kitni amiq-e-fikr ki lau

qadam qadam pe meri rah mein kitne sae hain

mata-e-zist mari lakh hech-maya sahi

magar sitare falak ke na jaane kyun yunhi

udas udas nigahon se mujh ko takte hain

bhala ye sae meri rah rok sakte hain