aarzu-e-hayat

ai ārzū-e-hayāt

ab kī baar jaan bhī chhoḌ

tujhe ḳhabar hī nahīñ kaise din guzarte haiñ

ai ārzū-e-nafas

ab muaaf kar mujh ko

tujhe ye ilm nahīñ kitnī mahñgī haiñ sāñseñ

ki tū to lafz hai

bas ek lafz adh-murda

tire ḳhamīr kī miTTī kā rañg laal gulāl

sulagtī aag ne tujh ko janā hai aur tū ḳhud

ik aisī bāñjh hai jis se koī ummīd nahīñ

tū aisā zahr hai jo pī ke koī bhī insāñ

ḳhud apne aap ko koī ḳhudā samajhtā hai

tū ik shajar hai jo bas dhuup bāñTtā hī rahe

tū ik safar hai jo sadiyoñ se baḌhtā jaatā hai

tū aisā dam hai jo murdoñ ko zinda kartā hai

tū vo karam hai jo har ik karīm māñgtā hai

tū vo talab hai jise ḳhud ḳhudā bhī pūjte haiñ

tū vo tarab hai jise ḳhud ḳhushī bhī māñgtī hai

tū mujh ko jitne bhī ab shoḳh rañg dikhlā.e

tū chāhe zindagī ko mere paas le aa.e

vaqār ab tire qadmoñ meñ girne vaalā nahīñ

ai ārzū-e-hayāt

ab maiñ pahle vaalā nahīñ

ai aarzu-e-hayat

ab ki bar jaan bhi chhoD

tujhe KHabar hi nahin kaise din guzarte hain

ai aarzu-e-nafas

ab muaf kar mujh ko

tujhe ye ilm nahin kitni mahngi hain sansen

ki tu to lafz hai

bas ek lafz adh-murda

tere KHamir ki miTTi ka rang lal gulal

sulagti aag ne tujh ko jana hai aur tu KHud

ek aisi banjh hai jis se koi ummid nahin

tu aisa zahr hai jo pi ke koi bhi insan

KHud apne aap ko koi KHuda samajhta hai

tu ek shajar hai jo bas dhup banTta hi rahe

tu ek safar hai jo sadiyon se baDhta jata hai

tu aisa dam hai jo murdon ko zinda karta hai

tu wo karam hai jo har ek karim mangta hai

tu wo talab hai jise KHud KHuda bhi pujte hain

tu wo tarab hai jise KHud KHushi bhi mangti hai

tu mujh ko jitne bhi ab shoKH rang dikhlae

tu chahe zindagi ko mere pas le aae

waqar ab tere qadmon mein girne wala nahin

ai aarzu-e-hayat

ab main pahle wala nahin