a-k-shaiKH ke peT ka kutta

raat bhar kuttā us ke peT meñ bhauñk rahā thā

kaisī kaisī āvāzeñ thiiñ

bhauñ bhauñ bhauñ bhauñ

vuuñ vuuñ vuuñ vuuñ

saarā kamra us kī pāgal āvāzoñ se

vuuñ vuuñ kartā haañp rahā thā

gaz-bhar lambī surḳh zabāñ bhī

us ke halq se nikal rahī thī

rāleñ muñh se Tapak rahī thiiñ

hilte kaan aur hiltī dum se

kuttā bhauñ bhauñ bhauñ bhauñ kartā

us ke peT meñ bhauñk rahā thā

vo soyā thā gahrī niiñd meñ

kuttā sūñgh ke gosht kī ḳhushbū

ḳhvāb se yak-dam jaag uThā thā

din niklā thā

a-k-shaiḳh ab bhūre suiT ke andar band thā

zar kī mehrāboñ ke nīche

lamha lamha dauḌ rahā thā

us ke bātin aur ḳhārij meñ

zard jahannam garm huā thā

raat aa.ī hai a-k-shaiḳh ab ghar aayā hai

kuttā us ke peT meñ phir se bhauñk paḌegā

raat bhar us ke TūTte jism pe

kuttā apnī dum ko hilātā

is kone se us kone tak

bhauñk bhauñk kar ġhurrā.egā

muñh se rāleñ Tapkā.egā

kuttā sūñgh ke gosht kī ḳhushbū

jism kī dīvāroñ ke uupar

dauḌ dauḌ ke thak jā.egā so jā.egā

din niklā hai

a-k-shaiḳh ab niile suiT ke andar band hai

a-k-shaiḳh ab kār-gahoñ kī chhat ke nīche

puure zor se chīḳh rahā hai

a-k-shaiḳh ke puure jism pe

zard jahannam phail rahā hai

zar kī mehrāboñ ke nīche

kaj-bātin aur pāgal kuttā dauḌ rahā hai

raat bhar kutta us ke peT mein bhaunk raha tha

kaisi kaisi aawazen thin

bhaun bhaun bhaun bhaun

wun wun wun wun

sara kamra us ki pagal aawazon se

wun wun karta hanp raha tha

gaz-bhar lambi surKH zaban bhi

us ke halq se nikal rahi thi

ralen munh se Tapak rahi thin

hilte kan aur hilti dum se

kutta bhaun bhaun bhaun bhaun karta

us ke peT mein bhaunk raha tha

wo soya tha gahri nind mein

kutta sungh ke gosht ki KHushbu

KHwab se yak-dam jag uTha tha

din nikla tha

a-k-shaiKH ab bhure suiT ke andar band tha

zar ki mehrabon ke niche

lamha lamha dauD raha tha

us ke baatin aur KHarij mein

zard jahannam garm hua tha

raat aai hai a-k-shaiKH ab ghar aaya hai

kutta us ke peT mein phir se bhaunk paDega

raat bhar us ke TuTte jism pe

kutta apni dum ko hilata

is kone se us kone tak

bhaunk bhaunk kar ghurraega

munh se ralen Tapkaega

kutta sungh ke gosht ki KHushbu

jism ki diwaron ke upar

dauD dauD ke thak jaega so jaega

din nikla hai

a-k-shaiKH ab nile suiT ke andar band hai

a-k-shaiKH ab kar-gahon ki chhat ke niche

pure zor se chiKH raha hai

a-k-shaiKH ke pure jism pe

zard jahannam phail raha hai

zar ki mehrabon ke niche

kaj-baatin aur pagal kutta dauD raha hai