aa jao

aa jaao paanī ke ghire taal meñ patthar saaf nazar aate haiñ

khiḌkī ke pīchhe chehroñ meñ siisa bhartā jaatā hai

raat akelī āñgan āñgan apne rassī pheñktī hai

ūñchī havelī ke dālān se pakke ber uThā kar

tere ḳhāl-o-ḳhat kā bosa letā huuñ

aur havā kī dhuup milī chādar ke nīche so jaatā huuñ

jaltā jism pahāḌ se din aur lohe kī bāDoñ meñ jhulse khet

mankā mankā aañsū girne ko haiñ

chiḌiyāñ ḳhvāboñ ke juzdāñ meñ varaq ulaTtī haiñ

phuul badan kī Tahnī par se TuuT ke girte jaate haiñ

aa jaao ThanDā paanī sharbat ban kar bilak rahā hai

jism buḳhār se piilā phuul banā hai

aa jao pani ke ghire tal mein patthar saf nazar aate hain

khiDki ke pichhe chehron mein sisa bharta jata hai

raat akeli aangan aangan apne rassi phenkti hai

unchi haweli ke dalan se pakke ber uTha kar

tere KHal-o-KHat ka bosa leta hun

aur hawa ki dhup mili chadar ke niche so jata hun

jalta jism pahaD se din aur lohe ki baDon mein jhulse khet

manka manka aansu girne ko hain

chiDiyan KHwabon ke juzdan mein waraq ulaTti hain

phul badan ki Tahni par se TuT ke girte jate hain

aa jao ThanDa pani sharbat ban kar bilak raha hai

jism buKHar se pila phul bana hai