aabu mein barsat

abr yuuñ chhā rahā hai aabū par

jaise pahrā ho dhundlī shāmoñ par

yā ki aa.eñ nazar siyah saa.e

larzāñ larzāñ bilaurī jāmoñ par

ye ghaTā chhā rahī hai sāvan kī

zulf bikhrī hai yā tire ruḳh par

bādaloñ meñ chamaktī hai bijlī

hañsī phūTī hai yā tire ruḳh par

girtī hai bādaloñ se yuuñ būñdeñ

jām-e-labrez juuñ chhalaktā hai

jhūmte haiñ havā se yuuñ ashjār

riñd pī pī ke juuñ bahaktā hai

sabza phūTā hai ye pahāḌoñ par

yā koī narm pairahan hai ye

hai ye rañg-e-bahār zeb-e-nazar

sabz joḌe kī yā phaban hai ye

jhiil se yuuñ lipaT gayā kohrā

bachcha ik maañ se juuñ lipaT jaa.e

yā ki bichhḌī huī sī doshīza

aa ke āġhosh meñ simaT jaa.e

chiir ke bādaloñ ko ek kiran

daf.atan jhiil par thirak jaa.e

jis tarah ik urūs-e-nau kā kahīñ

ruḳh se āñchal kabhī sarak jaa.e

duur kohsār meñ ye girte hue

saaz bajte haiñ ābshāroñ ke

qahqahe jaise nuqra.ī se kahīñ

guuñj uThte haiñ māh-pāroñ ke

kaale ujle se tairte bādal

jhiil kī sat.h par chamakte haiñ

naqsh jis tarah rañj-o-rāhat ke

dil ke ā.īne meñ jhalakte haiñ

ThanDī ThanDī havā ke jhoñkoñ meñ

yuuñ mirā iztirāb kho jaa.e

jaise rotā bisūrta bachcha

god meñ maañ kī thak ke so jaa.e

ek chanchal havā ke jhoñke se

sat.h-e-hamvār-e-āb hil jaa.e

jaise bād-e-sabā kī jumbish se

ġhuncha-e-nīm-bāz khil jaa.e

guuñj kar jaise nai-navāz kī nai

shab kā sannāTā toḌ detī hai

yūñhī so.e hue mire dil ko

yaad koī jhiñjhoḌ detī hai

jhāñk kar bādaloñ kī or se yuuñ

jhiil par chāñd thartharātā hai

jaise maazī ke dhuñdlakoñ se kahīñ

ik hasīñ chehra muskurātā hai

abr yun chha raha hai aabu par

jaise pahra ho dhundli shamon par

ya ki aaen nazar siyah sae

larzan larzan bilauri jamon par

ye ghaTa chha rahi hai sawan ki

zulf bikhri hai ya tere ruKH par

baadalon mein chamakti hai bijli

hansi phuTi hai ya tere ruKH par

girti hai baadalon se yun bunden

jam-e-labrez jun chhalakta hai

jhumte hain hawa se yun ashjar

rind pi pi ke jun bahakta hai

sabza phuTa hai ye pahaDon par

ya koi narm pairahan hai ye

hai ye rang-e-bahaar zeb-e-nazar

sabz joDe ki ya phaban hai ye

jhil se yun lipaT gaya kohra

bachcha ek man se jun lipaT jae

ya ki bichhDi hui si doshiza

aa ke aaghosh mein simaT jae

chir ke baadalon ko ek kiran

dafatan jhil par thirak jae

jis tarah ek urus-e-nau ka kahin

ruKH se aanchal kabhi sarak jae

dur kohsar mein ye girte hue

saz bajte hain aabshaaron ke

qahqahe jaise nuqrai se kahin

gunj uThte hain mah-paron ke

kale ujle se tairte baadal

jhil ki sath par chamakte hain

naqsh jis tarah ranj-o-rahat ke

dil ke aaine mein jhalakte hain

ThanDi ThanDi hawa ke jhonkon mein

yun mera iztirab kho jae

jaise rota bisurta bachcha

god mein man ki thak ke so jae

ek chanchal hawa ke jhonke se

sath-e-hamwar-e-ab hil jae

jaise baad-e-saba ki jumbish se

ghuncha-e-nim-baz khil jae

gunj kar jaise nai-nawaz ki nai

shab ka sannaTa toD deti hai

yunhi soe hue mere dil ko

yaad koi jhinjhoD deti hai

jhank kar baadalon ki or se yun

jhil par chand thartharaata hai

jaise mazi ke dhundlakon se kahin

ek hasin chehra muskuraata hai