aadhi gawahi

aziim munsif!!

hamārī qismat kī har adālat kā faisla hai

ki apnī be-hurmatī kī farmān le ke jaa.eñ

to apnā koī gavāh laa.eñ

gavāh

rishtoñ ke mohtaram kuñDliyoñ meñ baiThe

sañpoliyoñ kā

gavāh aisī haveliyoñ kā

ki jin meñ qānūn paaoñ dharne se kapkapā.e

kuñvārī chīḳheñ

bilak bilak ke sadā.eñ kartī

in hī añdheroñ meñ Duub jaa.eñ

magar vo is be basī kā apnī

na ek koī gavāh paa.eñ

kahāñ se laa.eñ

gavāh in bheḌiyoñ kā

jo apnī shahvatoñ par

ibādatoñ kī muqaddas-o-mohtaram ebā.eñ

sajā.e baiThe hoñ taak meñ

sauñdhe kachche jismoñ ke

jin ke bajroñ ke uud meñ

siskiyāñ sulagtī hoñ raat ko

aur din tilāvat ke lahn se

jagmagā.e jaa.eñ

ye mohtaram bheḌiye

ham un kī ḳhabāsatoñ kā gavāh laa.eñ

kahāñ se laa.eñ

hameñ koī aisā mo.ajaza de

ki gūñgī andhī siyāh shab ko

gavāhiyoñ kā hunar sikhā.eñ

ḳhabīr hai to

basīr hai to

tū jāntā hai

ki aaj tak maut ke alāva

koī na apnā gavāh paayā

hamīñ pe TūTīñ qayāmateñ bhī

hamīñ ne zillat kā baar uThāyā

kitāb-e-insāf ke musannif

tire sahīfe to kah rahe haiñ

ki saare insān zī-sharaf haiñ

fahīm haiñ

bāliġhun-nazar haiñ

sab apnī apnī kitāb kī rū se apne baare meñ bā-ḳhabar haiñ

to phir hamāre hī pusht par haath kyuuñ bañdhe haiñ

hamārī hī sab gavāhiyoñ par ye be-yaqīnī kī mohr kyuuñ hai

sabhī sahīfoñ meñ ye likhā hai

tire tarāzū kā

koī palḌā jhukā nahīñ hai

to kyā ye samjheñ

hamārā koī ḳhudā nahīñ hai

azim munsif!!

hamari qismat ki har adalat ka faisla hai

ki apni be-hurmati ki farman le ke jaen

to apna koi gawah laen

gawah

rishton ke mohtaram kunDliyon mein baiThe

sanpoliyon ka

gawah aisi haweliyon ka

ki jin mein qanun paon dharne se kapkapae

kunwari chiKHen

bilak bilak ke sadaen karti

in hi andheron mein Dub jaen

magar wo is be basi ka apni

na ek koi gawah paen

kahan se laen

gawah in bheDiyon ka

jo apni shahwaton par

ibaadaton ki muqaddas-o-mohtaram ebaen

sajae baiThe hon tak mein

saundhe kachche jismon ke

jin ke bajron ke ud mein

siskiyan sulagti hon raat ko

aur din tilawat ke lahn se

jagmagae jaen

ye mohtaram bheDiye

hum un ki KHabasaton ka gawah laen

kahan se laen

hamein koi aisa moajaza de

ki gungi andhi siyah shab ko

gawahiyon ka hunar sikhaen

KHabir hai to

basir hai to

tu jaanta hai

ki aaj tak maut ke alawa

koi na apna gawah paya

hamin pe TuTin qayamaten bhi

hamin ne zillat ka bar uThaya

kitab-e-insaf ke musannif

tere sahife to kah rahe hain

ki sare insan zi-sharaf hain

fahim hain

baalighun-nazar hain

sab apni apni kitab ki ru se apne bare mein ba-KHabar hain

to phir hamare hi pusht par hath kyun bandhe hain

hamari hi sab gawahiyon par ye be-yaqini ki mohr kyun hai

sabhi sahifon mein ye likha hai

tere taraazu ka

koi palDa jhuka nahin hai

to kya ye samjhen

hamara koi KHuda nahin hai