aadhi zindagi

āsmān kā ek hissa mere dekhne ke liye hai

aur zamīn kā ek hissa tumhāre chalne ke liye

sūraj tumhārī āñkhoñ se nikaltā aur chāñd

mere dil meñ Duub jaatā hai

samundar kā shor tumhāre dil meñ band hai aur

dariyā kī ḳhāmoshī merī āñkhoñ meñ

tum ek kashtī meñ safar kartī ho aur maiñ

us ke saath saath uḌne vaale bādal meñ

mujhe dīvār par baiThā huā safed kabūtar achchhā lagtā hai

aur tumheñ pinjre meñ qaid ek kaalī chiḌiyā

jo añdhere meñ bārish ke ba.ad

nikalne vaalī bair-bahoTiyoñ kī tarah surḳh ho jaatī hai

tumhārā dil granite se banā ek mor hai jo apne pairoñ ko dekh kar ro nahīñ saktā

aur merā dil miTTī meñ dhañsī huī ek bārūdī surañg

jo tumheñ rāste se guzartā dekh kar

dhamāke se TukḌe TukḌe honā bhuul jaatā hai

aasman ka ek hissa mere dekhne ke liye hai

aur zamin ka ek hissa tumhaare chalne ke liye

suraj tumhaari aankhon se nikalta aur chand

mere dil mein Dub jata hai

samundar ka shor tumhaare dil mein band hai aur

dariya ki KHamoshi meri aankhon mein

tum ek kashti mein safar karti ho aur main

us ke sath sath uDne wale baadal mein

mujhe diwar par baiTha hua safed kabutar achchha lagta hai

aur tumhein pinjre mein qaid ek kali chiDiya

jo andhere mein barish ke baad

nikalne wali bair-bahoTiyon ki tarah surKH ho jati hai

tumhaara dil granite se bana ek mor hai jo apne pairon ko dekh kar ro nahin sakta

aur mera dil miTTi mein dhansi hui ek barudi surang

jo tumhein raste se guzarta dekh kar

dhamake se TukDe TukDe hona bhul jata hai