aae basant

shahr kī ā.ankhoñ kā matl.a saaf ho

to dil meñ utre Dhaak ke phūloñ kī aañch

shahr ke nathune khuleñ to mauja-e-bād-e-junūb

aam par bor aa chukā hai ye ḳhabar phailā.e

shahr ke kānoñ se nikleñ shor-o-ġhul ke DaaT

to chhue shah-e-rag ko koyal kī pukār

shahr kī jaañ se ġhubār-e-shahr kā bādal chhaTe

to havās-e-ḳhamsa kī nagrī meñ bhī aa.e basant

shahr ki aaankhon ka matla saf ho

to dil mein utre Dhak ke phulon ki aanch

shahr ke nathune khulen to mauja-e-baad-e-junub

aam par bor aa chuka hai ye KHabar phailae

shahr ke kanon se niklen shor-o-ghul ke DaT

to chhue shah-e-rag ko koyal ki pukar

shahr ki jaan se ghubar-e-shahr ka baadal chhaTe

to hawas-e-KHamsa ki nagri mein bhi aae basant