aagahi ki dua

ai ḳhudā ai ḳhudā

maiñ huuñ masrūf-e-tasbīh-o-hamd-o-sanā

go ba-zāhir ibādat kī aadat nahīñ hai

riñd-mashrab huuñ zohd-o-riyāzat se raġhbat nahīñ hai

magar jab bhī chaltā hai merā qalam

jab bhī khultī hai merī zabāñ

kuchh kahūñ kuchh likhūñ

terī taḳhlīq kā zamzama mudda.ā muntahā

harf juḌ kar baneñ lafz to karte haiñ terī hamd-o-sanā

yā ḳhudā yā ḳhudā

mere atrāf haiñ peT ḳhālī badan-e-nīm-jāñ

koī taktā hai jab merā dast-e-tahī

sharm aatī hai mujh ko ḳhudā-e-ġhanī

sochtā huuñ maiñ apnī zabāñ rehn rakh duuñ kahīñ

rizq se ḳhālī peToñ ko bhar duuñ

jo haiñ nīm-jāñ un meñ jaan phūñk duuñ

aur apne liye thoḌī āsā.isheñ mol le aa.uuñ bāzār se

apne bachchoñ kī zid puurī kar duuñ

jo vāqif nahīñ haiñ ma.īshat ke andāz-o-raftār se

phir yahī sochtā huuñ

ḳhudā ai ḳhudā

kyā zabāñ rehn ho kar bhī terī itā.at karegī

kyā qalam bik ke bhī naam terā hī legā

dūsroñ ko ḳhudā maan kar

vo na karne lageñ mā-sivā kī bhī hamd-o-sanā

ai ḳhudā ai ḳhudā hai duā

āḳhirī saañs tak

ye qalam ye zabāñ

likhte rahte haiñ lā-ilāha

ai KHuda ai KHuda

main hun masruf-e-tasbih-o-hamd-o-sana

go ba-zahir ibaadat ki aadat nahin hai

rind-mashrab hun zohd-o-riyazat se raghbat nahin hai

magar jab bhi chalta hai mera qalam

jab bhi khulti hai meri zaban

kuchh kahun kuchh likhun

teri taKHliq ka zamzama muddaa muntaha

harf juD kar banen lafz to karte hain teri hamd-o-sana

ya KHuda ya KHuda

mere atraf hain peT KHali badan-e-nim-jaan

koi takta hai jab mera dast-e-tahi

sharm aati hai mujh ko KHuda-e-ghani

sochta hun main apni zaban rehn rakh dun kahin

rizq se KHali peTon ko bhar dun

jo hain nim-jaan un mein jaan phunk dun

aur apne liye thoDi aasaishen mol le aaun bazar se

apne bachchon ki zid puri kar dun

jo waqif nahin hain maishat ke andaz-o-raftar se

phir yahi sochta hun

KHuda ai KHuda

kya zaban rehn ho kar bhi teri itaat karegi

kya qalam bik ke bhi nam tera hi lega

dusron ko KHuda man kar

wo na karne lagen ma-siwa ki bhi hamd-o-sana

ai KHuda ai KHuda hai dua

aaKHiri sans tak

ye qalam ye zaban

likhte rahte hain la-ilaha