aahang-e-nau

ai javānān-e-vatan ruuh javāñ hai to uTho

aañkh us mahshar-e-nau kī nigarāñ hai to uTho

ḳhauf-e-be-hurmatī-o-fikr-e-ziyāñ hai to uTho

pās-e-nāmūs-e-nigrān-e-jahāñ hai to uTho

uTho naqqāra-e-aflāk bajā do uTh kar

ek so.e hue aalam ko jagā do uTh kar

ek ik samt se shab-ḳhūn kī tayyārī hai

lutf kā va.ada hai aur mashq-e-jafā-kārī hai

mahfil-e-zīst pe farmān-e-qazā jaarī hai

shahr to shahr hai gaañv pe bhī bambārī hai

ye fazā meñ jo garajte hue tayyāre haiñ

barsar-e-dosh-e-havā maut ke harkāre haiñ

is taraf hāthoñ meñ shamshīreñ hī shamshīreñ haiñ

us taraf zehn meñ tadbīreñ hī tadbīreñ haiñ

zulm par zulm haiñ tāzīroñ pe ta.azīreñ haiñ

sar pe talvār hai aur paañv meñ zanjīreñ haiñ

ek ho ek ki hañgāma-e-mahshar hai yahī

arsa-e-zīst kā hangāma-e-akbar hai yahī

apnī sarhad pe jo aġhyār chale aate haiñ

sho.ala-afshāñ o sharar-bār chale aate haiñ

ḳhuun piite hue sarshār chale aate haiñ

tum jo uTh jaao to be-kār chale aate haiñ

ḳhuuñ jo bah niklā hai us ḳhuuñ meñ bahā do un ko

un kī khodī huī ḳhandaq meñ girā do un ko

rañg-e-gul-hā-e-gulistān-e-vatan tum se hai

sorish-e-na.ara-e-rindān-e-vatan tum se hai

nashsha-e-nargis-e-ḳhūbān-e-vatan tum se hai

iffat-e-māh-e-jabīnān-e-vatan tum se hai

tum ho ġhairat ke amiiñ tum ho sharāfat ke amiiñ

aur ye ḳhatre meñ haiñ ehsās tumheñ hai ki nahīñ

ye darinde ye sharāfat ke purāne dushman

tum ki ho hāmil-e-ādāb-o-rivāyāt-e-kuhan

jāda-paimā ke liye ḳhizr ho tum ye rahzan

tum ho ḳhirman ke nigahbān ye barq-e-ḳhirman

ḳhitta-e-pāk meñ zinhār na aane paa.eñ

aa hī jaa.eñ jo ye zinda to na jaane paa.eñ

mard-o-zan pīr-o-javāñ in ke mazālim ke shikār

ḳhūn-e-ma.asūm meñ Duubī huī in kī talvār

ye qayāmat ke havasnāk ġhazab ke ḳhūñ-ḳhār

in ke isyāñ kī na had hai na jarā.em kā shumār

ye tarahhum se na dekheñge kisī kī jānib

in kī topoñ ke dahan kar do unhī kī jānib

ye to haiñ fitna-e-bedār dabā do in ko

ye miTā deñge tamaddun ko miTā do in ko

phūñk do in ko jhulas do ki jilā do in ko

shān-e-shāyān-e-vatan ho ye batā do in ko

yaad hai tum ko kin aslāf kī tum yādeñ ho

tum to ḳhālid ke pisar bhiim kī aulādeñ ho

tum to tanhā bhī nahīñ ho ka.ī dam-sāz bhī haiñ

ruus ke mard bhī haiñ chiin ke jāñ-bāz bhī haiñ

kuchh na kuchh saath farañgī ke fusūñ-sāz bhī haiñ

aur ham jaise bahut zamzama-pardāz bhī haiñ

duur insān ke sar se ye musībat kar do

aag dozaḳh kī bujhā do ise jannat kar do

ai jawanan-e-watan ruh jawan hai to uTho

aankh us mahshar-e-nau ki nigaran hai to uTho

KHauf-e-be-hurmati-o-fikr-e-ziyan hai to uTho

pas-e-namus-e-nigran-e-jahan hai to uTho

uTho naqqara-e-aflak baja do uTh kar

ek soe hue aalam ko jaga do uTh kar

ek ek samt se shab-KHun ki tayyari hai

lutf ka wada hai aur mashq-e-jafa-kari hai

mahfil-e-zist pe farman-e-qaza jari hai

shahr to shahr hai ganw pe bhi bambari hai

ye faza mein jo garajte hue tayyare hain

barsar-e-dosh-e-hawa maut ke harkare hain

is taraf hathon mein shamshiren hi shamshiren hain

us taraf zehn mein tadbiren hi tadbiren hain

zulm par zulm hain taziron pe taziren hain

sar pe talwar hai aur panw mein zanjiren hain

ek ho ek ki hangama-e-mahshar hai yahi

arsa-e-zist ka hangama-e-akbar hai yahi

apni sarhad pe jo aghyar chale aate hain

shoala-afshan o sharar-bar chale aate hain

KHun pite hue sarshaar chale aate hain

tum jo uTh jao to be-kar chale aate hain

KHun jo bah nikla hai us KHun mein baha do un ko

un ki khodi hui KHandaq mein gira do un ko

rang-e-gul-ha-e-gulistan-e-watan tum se hai

sorish-e-nara-e-rindan-e-watan tum se hai

nashsha-e-nargis-e-KHuban-e-watan tum se hai

iffat-e-mah-e-jabinan-e-watan tum se hai

tum ho ghairat ke amin tum ho sharafat ke amin

aur ye KHatre mein hain ehsas tumhein hai ki nahin

ye darinde ye sharafat ke purane dushman

tum ki ho hamil-e-adab-o-riwayat-e-kuhan

jada-paima ke liye KHizr ho tum ye rahzan

tum ho KHirman ke nigahban ye barq-e-KHirman

KHitta-e-pak mein zinhaar na aane paen

aa hi jaen jo ye zinda to na jaane paen

mard-o-zan pir-o-jawan in ke mazalim ke shikar

KHun-e-masum mein Dubi hui in ki talwar

ye qayamat ke hawasnak ghazab ke KHun-KHar

in ke isyan ki na had hai na jaraem ka shumar

ye tarahhum se na dekhenge kisi ki jaanib

in ki topon ke dahan kar do unhi ki jaanib

ye to hain fitna-e-bedar daba do in ko

ye miTa denge tamaddun ko miTa do in ko

phunk do in ko jhulas do ki jila do in ko

shan-e-shayan-e-watan ho ye bata do in ko

yaad hai tum ko kin aslaf ki tum yaaden ho

tum to KHalid ke pisar bhim ki auladen ho

tum to tanha bhi nahin ho kai dam-saz bhi hain

rus ke mard bhi hain chin ke jaan-baz bhi hain

kuchh na kuchh sath farangi ke fusun-saz bhi hain

aur hum jaise bahut zamzama-pardaz bhi hain

dur insan ke sar se ye musibat kar do

aag dozaKH ki bujha do ise jannat kar do