aahista se guzro

guzarnā hī agar Thahrā

to āhista se guzro

koī aahaT na ho paa.e

abhī raste meñ rasta so rahā hai

abhī vīrānī ke pahlū meñ ḳhvābīda hai ḳhāmoshī

abhī tanhā.ī se lipTī masāfat so rahī hai

kahīñ aisā na ho

dasht-e-tahayyur jaag jaa.e

lahū meñ be-karāñ ġham kā samundar jaag jaa.e

abhī to pahle Dar hī se ragoñ meñ ḳhāmushī hai

abhī to ḳhuun kī har buuñd ruk ruk ke saraktī hai

abhī ġham dil meñ

kuchh is andāz se karvaT badaltā hai

nahīñ hotā zarā mahsūs bhī vo saañs letā hai

ba-zāhir so rahā hai ye samundar

is ko sone do

hameñ bhī apne hone par zarā sā khul ke rone do

guzarnā ho to is manzar se āhista

bahut āhista se guzro

abhī to dhuup chhāñv kā

tamāshā ho rahā hai

abhī ashjār ke saa.e meñ dariyā so rahā hai

koī is ke kināre

bādaloñ sā ro rahā hai

guzarna hi agar Thahra

to aahista se guzro

koi aahaT na ho pae

abhi raste mein rasta so raha hai

abhi virani ke pahlu mein KHwabida hai KHamoshi

abhi tanhai se lipTi masafat so rahi hai

kahin aisa na ho

dasht-e-tahayyur jag jae

lahu mein be-karan gham ka samundar jag jae

abhi to pahle Dar hi se ragon mein KHamushi hai

abhi to KHun ki har bund ruk ruk ke sarakti hai

abhi gham dil mein

kuchh is andaz se karwaT badalta hai

nahin hota zara mahsus bhi wo sans leta hai

ba-zahir so raha hai ye samundar

is ko sone do

hamein bhi apne hone par zara sa khul ke rone do

guzarna ho to is manzar se aahista

bahut aahista se guzro

abhi to dhup chhanw ka

tamasha ho raha hai

abhi ashjar ke sae mein dariya so raha hai

koi is ke kinare

baadalon sa ro raha hai