aaina dekhna

aa.ina dekhne kā shauq hai vo

is kā har shaḳhs mubtalā dekhā

sāmne aa.ine ke ban-Than kar

ham ne ahbāb ko khaḌā dekhā

koī mūchhoñ pe taao detā hai

koī DāḌhī sañvārtā dekhā

koī kapḌoñ ko saaf kartā hai

koī muñh dekhtā huā dekhā

shāna hai yā barash hai yā rūmāl

haath ḳhālī na ek kā dekhā

shauq hai aam jāma-zebī kā

jis ko dekhā hai ḳhud-numā dekhā

dekhā sab ne hī apnā jism-o-libās

lek ye tarfa mājrā dekhā

dekhne se kabhī nahīñ serī

rose go chehra bārhā dekhā

apnī sūrat ke sab haiñ shaidā.ī

sab ko apnā farefta dekhā

sūrat-e-zāhirī magar ai dost

jis ne dekhī hai us ne kyā dekhā

dekhne vaalā us ko kahte haiñ

jis ne bātin bhī barmalā dekhā

dil kā ā.īna paas hai sab ke

saaf aisā kam aa.inā dekhā

mujh se pūchho to vo hai nek-nasīb

jis ne ye aa.ina zarā dekhā

sūrat-e-hāl hai ḳhabar paa.ī

aur apnā burā bhalā dekhā

nutq o atvār diin aur īmāñ

sab ko jaise haiñ barmalā dekhā

aur phir le ke sa.ī kā rūmāl

naqs jo jo ki jā-ba-jā dekhā

us kī is tarah se safā.ī kī

ki na āñkhoñ ne phir zarā dekhā

ye hai ā.īna dekhnā ai dost

dekhā is tarah to bajā dekhā

aaina dekhne ka shauq hai wo

is ka har shaKHs mubtala dekha

samne aaine ke ban-Than kar

hum ne ahbab ko khaDa dekha

koi muchhon pe tao deta hai

koi DaDhi sanwarta dekha

koi kapDon ko saf karta hai

koi munh dekhta hua dekha

shana hai ya barash hai ya rumal

hath KHali na ek ka dekha

shauq hai aam jama-zebi ka

jis ko dekha hai KHud-numa dekha

dekha sab ne hi apna jism-o-libas

lek ye tarfa majra dekha

dekhne se kabhi nahin seri

rose go chehra barha dekha

apni surat ke sab hain shaidai

sab ko apna farefta dekha

surat-e-zahiri magar ai dost

jis ne dekhi hai us ne kya dekha

dekhne wala us ko kahte hain

jis ne baatin bhi barmala dekha

dil ka aaina pas hai sab ke

saf aisa kam aaina dekha

mujh se puchho to wo hai nek-nasib

jis ne ye aaina zara dekha

surat-e-haal hai KHabar pai

aur apna bura bhala dekha

nutq o atwar din aur iman

sab ko jaise hain barmala dekha

aur phir le ke sai ka rumal

naqs jo jo ki ja-ba-ja dekha

us ki is tarah se safai ki

ki na aankhon ne phir zara dekha

ye hai aaina dekhna ai dost

dekha is tarah to baja dekha