aaina

mirī bilkul na.ī aur ḳhūbsūrat Diary par

jab us ke nanhe munne haath

TeḌhī meḌhī lakīreñ khīñch kar

apne bachpan ko pesh karte haiñ

to mujhe bilkul ġhussa nahīñ aatā

use haq hai ki vo apnī ma.asūm ḳhvāhishāt

apnī soch apnī chhoTī sī duniyā ko

kāġhaz par utaar de

apne dimāġh kī har girah khol kar rakh de

juuñ kā tuuñ apnā bachpan

kāġhaz ke pairahan meñ Dhaal kar

mutma.in ho kar

roz kī tarah dauḌī dauḌī mere paas aa.e

mere gale meñ bāñheñ Daal kar pūchhe

daadī aap kī tasvīr banā.ūñ

aur mere javāb kā intizār kiye baġhair

ik ajab shān-e-be-niyāzī se

sketch-pen aur Diary le kar

merī tasvīr banāne meñ masrūf ho jaa.e

aur apnī ye tasvīr maiñ duniyā ke sāmne pesh karūñ

ki bachche chhoTe nahīñ hote

us kī banā.ī huī ye tasvīr

merā aslī ā.īna ban jaa.e

meri bilkul nai aur KHubsurat Diary par

jab us ke nanhe munne hath

TeDhi meDhi lakiren khinch kar

apne bachpan ko pesh karte hain

to mujhe bilkul ghussa nahin aata

use haq hai ki wo apni masum KHwahishat

apni soch apni chhoTi si duniya ko

kaghaz par utar de

apne dimagh ki har girah khol kar rakh de

jun ka tun apna bachpan

kaghaz ke pairahan mein Dhaal kar

mutmain ho kar

roz ki tarah dauDi dauDi mere pas aae

mere gale mein banhen Dal kar puchhe

dadi aap ki taswir banaun

aur mere jawab ka intizar kiye baghair

ek ajab shan-e-be-niyazi se

sketch-pen aur Diary le kar

meri taswir banane mein masruf ho jae

aur apni ye taswir main duniya ke samne pesh karun

ki bachche chhoTe nahin hote

us ki banai hui ye taswir

mera asli aaina ban jae