aaj ke baad

aaj ke ba.ad agar jiinā hai

aaj kā sab kuchh taj denā hai

ek jhalak meñ

ek jhapak meñ

zaḳhmī chhalnī us paikar ko

apne lahū kī aag meñ

jal jaane do

gal jaane do

armānoñ se bāhar aao

apne-āp se aage baḌh jaao

sīmāoñ se paar utar kar

dekho

kaisī khulī fazā hai

har shai maiñ jaise

aane vaalī duniyāoñ kā biij chhupā hai

bījoñ se peḌ sunahre peḌ

peḌoñ ke har kholar meñ

panchhī anDe sete haiñ

anDoñ ke ḳhol se aane vaalī

be-āvāz suroñ kī guuñj suno

aur un se apne giit buno

aaj ke baad agar jina hai

aaj ka sab kuchh taj dena hai

ek jhalak mein

ek jhapak mein

zaKHmi chhalni us paikar ko

apne lahu ki aag mein

jal jaane do

gal jaane do

armanon se bahar aao

apne-ap se aage baDh jao

simaon se par utar kar

dekho

kaisi khuli faza hai

har shai main jaise

aane wali duniyaon ka bij chhupa hai

bijon se peD sunahre peD

peDon ke har kholar mein

panchhi anDe sete hain

anDon ke KHol se aane wali

be-awaz suron ki gunj suno

aur un se apne git buno