aaj ke din

tāb-e-nazzāra kahāñ kis ko bhalā aaj ke din

zarra-zarra huā ḳhurshīd-numā aaj ke din

mast-o-sarshār chaman lāla-o-nargis shādāb

jhuum kar chhā.ī hai gulshan pe ghaTā aaj ke din

jaam par jaam chhalakne lage maiḳhāne meñ

saath mai piite haiñ arbāb-e-vafā aaj ke din

mehñdī hāthoñ meñ hinā pairahan-e-rangīñ meñ

mah-vashoñ kī koī dekhe to adā aaj ke din

dosto sidq-o-ahinsā ke usūloñ pe chalo

chhoḌ do rasm-o-rah-e-jaur-o-jafā aaj ke din

mutrib-e-vaqt se kah do koī naġhma chheḌe

guuñj uThe saaz pe shā.ir kī navā aaj ke din

zehn-o-bātin ko karo saaf zarā ham-vatano

siikh lo rasm-e-vafā sidq-o-safā aaj ke din

kaun sī bazm hai jis meñ nahīñ sāmān-e-tarab

hai bashar kaun jo shādān na ho aaj ke din

miT ga.ī tīra-shabī mehr-e-munavvar se 'basant'

nuur hī nuur gulistāñ meñ huā aaj ke din

tab-e-nazzara kahan kis ko bhala aaj ke din

zarra-zarra hua KHurshid-numa aaj ke din

mast-o-sarshaar chaman lala-o-nargis shadab

jhum kar chhai hai gulshan pe ghaTa aaj ke din

jam par jam chhalakne lage maiKHane mein

sath mai pite hain arbab-e-wafa aaj ke din

mehndi hathon mein hina pairahan-e-rangin mein

mah-washon ki koi dekhe to ada aaj ke din

dosto sidq-o-ahinsa ke usulon pe chalo

chhoD do rasm-o-rah-e-jaur-o-jafa aaj ke din

mutrib-e-waqt se kah do koi naghma chheDe

gunj uThe saz pe shair ki nawa aaj ke din

zehn-o-baatin ko karo saf zara ham-watano

sikh lo rasm-e-wafa sidq-o-safa aaj ke din

kaun si bazm hai jis mein nahin saman-e-tarab

hai bashar kaun jo shadan na ho aaj ke din

miT gai tira-shabi mehr-e-munawwar se 'basant'

nur hi nur gulistan mein hua aaj ke din