aaj ki aurat

mujhe dekho

mujhe socho

mujhe samjho

mirī bebāk nazroñ kī tahoñ meñ koī majbūrī nahīñ hai

mirā idrāk hai jo mujh ko mere

ḳhair pe hone kī masnad par biThātā hai

mujhe ye ilm hai ki maiñ

ujāloñ kī tarah se phail jaatī huuñ

haqīqat roz-e-raushan hai

jahāñ har ik chamaktī ret paanī ban nahīñ saktī

haqīqat apnī fitrat meñ kahānī ban nahīñ saktī

mirī bebāk-nazarī kā ġhalat matlab na le lenā

mujhe bahrūp bharne kī adā aatī nahīñ hai

mujhe ghuT ghuT ke jiine kī adā aatī nahīñ hai

mirā idrāk hai jo mujh ko mere ḳhair par hone kī masnad par biThātā hai

maiñ aisī huuñ dikhānā chāhtī huuñ

maiñ kaisī huuñ batānā chāhtī huuñ

mujhe dekho

mujhe socho

mujhe samjho

maiñ aurat huuñ

haqīqat huuñ

mujhe dekho

mujhe socho

mujhe samjho

meri bebak nazron ki tahon mein koi majburi nahin hai

mera idrak hai jo mujh ko mere

KHair pe hone ki masnad par biThata hai

mujhe ye ilm hai ki main

ujalon ki tarah se phail jati hun

haqiqat roz-e-raushan hai

jahan har ek chamakti ret pani ban nahin sakti

haqiqat apni fitrat mein kahani ban nahin sakti

meri bebak-nazari ka ghalat matlab na le lena

mujhe bahrup bharne ki ada aati nahin hai

mujhe ghuT ghuT ke jine ki ada aati nahin hai

mera idrak hai jo mujh ko mere KHair par hone ki masnad par biThata hai

main aisi hun dikhana chahti hun

main kaisi hun batana chahti hun

mujhe dekho

mujhe socho

mujhe samjho

main aurat hun

haqiqat hun