aaj ki baaten kal ke sapne

jab bhī tanhā mujhe paate haiñ guzarte lamhe

terī tasvīr sī rāhoñ meñ bichhā jaate haiñ

maiñ ki rāhoñ meñ bhaTaktā hī chalā jaatā huuñ

mujh ko ḳhud merī nigāhoñ se chhupā jaate haiñ

mere bechain ḳhayāloñ pe ubharne vaalī

apne ḳhvāboñ se na bahlā merī tanhā.ī ko

jab tirī saañs mirī saañs meñ tahlīl nahīñ

kyā kareñgī mirī bāñheñ terī añgḌā.ī ko

jab ḳhayāloñ meñ tire jism ko chhū letā huuñ

zindagī sho.ala-e-māzī se jhulas jaatī hai

jab guzarnā huuñ ġham-e-hāl ke vīrāne se

mere ehsās kī nāgin mujhe Das jaatī hai

ham-safar tujh ko kahūñ yā tujhe rahzan samjhūñ

raah meñ lā ke mujhe chhoḌ diyā hai tū ne

ek vo din ki tirā pyaar basā thā dil meñ

ek ye vaqt ki dil toḌ diyā hai tū ne

maazī o haal kī tafrīq vo qurbat ye firāq

pyaar gulshan se chalā aayā hai zindānoñ meñ

be-zarī apnī sadāqat ko parakhtī hī rahī

tal gayā husn zar-o-sīm kī mīzānoñ meñ

ġhair se resham-o-kam-ḳhvāb kī rāhat pā kar

tū mujhe yaad bhī aa.egī to kyā aa.egī

ek mustaqbil-e-zarrīñ kī tijārat ke liye

tū mohabbat ke taqaddus ko bhī Thukrā.egī

aur maiñ pyaar kī taqdīs pe marne vaalā

dard ban kar tire ehsās meñ bas jā.ūñgā

vaqt aa.egā to iḳhlās kā bādal ban kar

terī jhulsī huī rātoñ pe baras jā.ūñgā

jab bhi tanha mujhe pate hain guzarte lamhe

teri taswir si rahon mein bichha jate hain

main ki rahon mein bhaTakta hi chala jata hun

mujh ko KHud meri nigahon se chhupa jate hain

mere bechain KHayalon pe ubharne wali

apne KHwabon se na bahla meri tanhai ko

jab teri sans meri sans mein tahlil nahin

kya karengi meri banhen teri angDai ko

jab KHayalon mein tere jism ko chhu leta hun

zindagi shoala-e-mazi se jhulas jati hai

jab guzarna hun gham-e-haal ke virane se

mere ehsas ki nagin mujhe Das jati hai

ham-safar tujh ko kahun ya tujhe rahzan samjhun

rah mein la ke mujhe chhoD diya hai tu ne

ek wo din ki tera pyar basa tha dil mein

ek ye waqt ki dil toD diya hai tu ne

mazi o haal ki tafriq wo qurbat ye firaq

pyar gulshan se chala aaya hai zindanon mein

be-zari apni sadaqat ko parakhti hi rahi

tal gaya husn zar-o-sim ki mizanon mein

ghair se resham-o-kam-KHwab ki rahat pa kar

tu mujhe yaad bhi aaegi to kya aaegi

ek mustaqbil-e-zarrin ki tijarat ke liye

tu mohabbat ke taqaddus ko bhi Thukraegi

aur main pyar ki taqdis pe marne wala

dard ban kar tere ehsas mein bas jaunga

waqt aaega to iKHlas ka baadal ban kar

teri jhulsi hui raaton pe baras jaunga