aaj ki duniya

duniyā ko inqalāb kī yaad aa rahī hai aaj

tārīḳh apne aap ko dohrā rahī hai aaj

vo sar uThā.e mauj-e-fanā aa rahī hai aaj

mauj-e-hayāt maut se Takrā rahī hai aaj

kānoñ meñ zalzaloñ kī dhamak aa rahī hai aaj

har chiiz kā.enāt kī tharrā rahī hai aaj

jhapkā rahī hai der se āñkheñ havā-e-dahr

kaun-o-makāñ ko niiñd sī kuchh aa rahī hai aaj

har lafz ke ma.ānī-o-matlab badal chuke

har baat aur baat huī jā rahī hai aaj

yaksar jahān-e-husn bhī badlā huā sā hai

duniyā-e-ishq aur nazar aa rahī hai aaj

har har shikast-e-sāz meñ hai lahn-e-sarmadī

yā zindagī ke giit ajal gā rahī hai aaj

ye dāman-e-ajal hai ki tahrīk-e-ġhaib hai

kyā shai havā-e-dahr ko sankā rahī hai aaj

abnā-e-dahr lete haiñ yuuñ saañs garm-o-tez

jiine meñ jaise der huī jā rahī hai aaj

aflāk kī jabīñ bhī shikan-dar-shikan sī hai

tyorī zamīn kī bhī chaḌhī jā rahī hai aaj

phir chheḌtī hai maut hayāt-e-fasurda ko

phir ātish-e-ḳhamosh ko uksā rahī hai aaj

barham sā kuchh mizāj-e-anāsir hai in dinoñ

aur kuchh tabī.at apnī bhī ghabrā rahī hai aaj

ik mauj-e-dūd siine meñ larzāñ hai is tarah

nāgin sī jaise shīshe meñ lahrā rahī hai aaj

biite jugoñ kī chhāñv hai imroz par 'firāq'

har chiiz ik fasāna huī jā rahī hai aaj

duniya ko inqalab ki yaad aa rahi hai aaj

tariKH apne aap ko dohra rahi hai aaj

wo sar uThae mauj-e-fana aa rahi hai aaj

mauj-e-hayat maut se Takra rahi hai aaj

kanon mein zalzalon ki dhamak aa rahi hai aaj

har chiz kaenat ki tharra rahi hai aaj

jhapka rahi hai der se aankhen hawa-e-dahr

kaun-o-makan ko nind si kuchh aa rahi hai aaj

har lafz ke maani-o-matlab badal chuke

har baat aur baat hui ja rahi hai aaj

yaksar jahan-e-husn bhi badla hua sa hai

duniya-e-ishq aur nazar aa rahi hai aaj

har har shikast-e-saz mein hai lahn-e-sarmadi

ya zindagi ke git ajal ga rahi hai aaj

ye daman-e-ajal hai ki tahrik-e-ghaib hai

kya shai hawa-e-dahr ko sanka rahi hai aaj

abna-e-dahr lete hain yun sans garm-o-tez

jine mein jaise der hui ja rahi hai aaj

aflak ki jabin bhi shikan-dar-shikan si hai

tyori zamin ki bhi chaDhi ja rahi hai aaj

phir chheDti hai maut hayat-e-fasurda ko

phir aatish-e-KHamosh ko uksa rahi hai aaj

barham sa kuchh mizaj-e-anasir hai in dinon

aur kuchh tabiat apni bhi ghabra rahi hai aaj

ek mauj-e-dud sine mein larzan hai is tarah

nagin si jaise shishe mein lahra rahi hai aaj

bite jugon ki chhanw hai imroz par 'firaq'

har chiz ek fasana hui ja rahi hai aaj