aaj ki raat

dekhnā jalva-e-jānāñ kā asar aaj kī raat

phuul hī phuul haiñ tā-hadd-e-nazar aaj kī raat

rā.egāñ jā na sakā aañkh se us kā bahnā

rang laayā hai mirā ḳhūn-e-jigar aaj kī raat

dāman-e-shauq ko thāme hue haiñ sharm-o-hayā

dil dhaḌaktā hai ba-andāz-e-digar aaj kī raat

husn-o-taqdīs kī dilchasp hikāyat paḌh kar

dhun rahā hai dil-e-hairat-zadā sar aaj kī raat

chāñd ik matl.a-e-anvār-e-daraḳhshāñ hī sahī

ek tasvīr hai hairat kī magar aaj kī raat

jalva-e-husn ke iḳhrāj kā aalam dekho

merī nazroñ meñ haiñ raqsāñ se sharar aaj kī raat

jazba-e-sharm ne chhiḌkāv kiyā shabnam kā

ruḳh-e-gulnār hai ik sho.ala-e-tar aaj kī raat

mai-e-ulfat kā chhalaktā huā paimāna hai

us kī sharmīlī sī tirchhī sī nazar aaj kī raat

ye duā-e-dil-e-ma.asūm ulūhī ho qubūl

tā-qayāmat rahe mahrūm sahar aaj kī raat

dekhna jalwa-e-jaanan ka asar aaj ki raat

phul hi phul hain ta-hadd-e-nazar aaj ki raat

raegan ja na saka aankh se us ka bahna

rang laya hai mera KHun-e-jigar aaj ki raat

daman-e-shauq ko thame hue hain sharm-o-haya

dil dhaDakta hai ba-andaz-e-digar aaj ki raat

husn-o-taqdis ki dilchasp hikayat paDh kar

dhun raha hai dil-e-hairat-zada sar aaj ki raat

chand ek matla-e-anwar-e-daraKHshan hi sahi

ek taswir hai hairat ki magar aaj ki raat

jalwa-e-husn ke iKHraj ka aalam dekho

meri nazron mein hain raqsan se sharar aaj ki raat

jazba-e-sharm ne chhiDkaw kiya shabnam ka

ruKH-e-gulnar hai ek shoala-e-tar aaj ki raat

mai-e-ulfat ka chhalakta hua paimana hai

us ki sharmili si tirchhi si nazar aaj ki raat

ye dua-e-dil-e-masum uluhi ho qubul

ta-qayamat rahe mahrum sahar aaj ki raat