aaj ki shab to kisi taur guzar jaegi

aaj kī shab to kisī taur guzar jā.egī

raat gahrī hai magar chāñd chamaktā hai abhī

mere māthe pe tirā pyaar damaktā hai abhī

merī sāñsoñ meñ tirā lams mahaktā hai abhī

mere siine meñ tirā naam dhaḌaktā hai abhī

ziist karne ko mire paas bahut kuchh hai abhī

terī āvāz kā jaadū hai abhī mere liye

tere malbūs kī ḳhushbū hai abhī mere liye

terī bāñheñ tirā pahlū hai abhī mere liye

sab se baḌh kar mirī jaañ tū hai abhī mere liye

ziist karne ko mire paas bahut kuchh hai abhī

aaj kī shab to kisī taur guzar jā.egī!

aaj ke ba.ad magar rañg-e-vafā kyā hogā

ishq hairāñ hai sar-e-shahr-e-sabā kyā hogā

mere qātil tirā andāz-e-jafā kyā hogā!

aaj kī shab to bahut kuchh hai magar kal ke liye

ek andesha-e-be-nām hai aur kuchh bhī nahīñ

dekhnā ye hai ki kal tujh se mulāqāt ke ba.ad

rañg-e-ummīd khilegā ki bikhar jā.egā

vaqt parvāz karegā ki Thahar jā.egā

jiit ho jā.egī yā khel bigaḌ jā.egā

ḳhvāb kā shahr rahegā ki ujaḌ jā.egā

aaj ki shab to kisi taur guzar jaegi

raat gahri hai magar chand chamakta hai abhi

mere mathe pe tera pyar damakta hai abhi

meri sanson mein tera lams mahakta hai abhi

mere sine mein tera nam dhaDakta hai abhi

zist karne ko mere pas bahut kuchh hai abhi

teri aawaz ka jadu hai abhi mere liye

tere malbus ki KHushbu hai abhi mere liye

teri banhen tera pahlu hai abhi mere liye

sab se baDh kar meri jaan tu hai abhi mere liye

zist karne ko mere pas bahut kuchh hai abhi

aaj ki shab to kisi taur guzar jaegi!

aaj ke baad magar rang-e-wafa kya hoga

ishq hairan hai sar-e-shahr-e-saba kya hoga

mere qatil tera andaz-e-jafa kya hoga!

aaj ki shab to bahut kuchh hai magar kal ke liye

ek andesha-e-be-nam hai aur kuchh bhi nahin

dekhna ye hai ki kal tujh se mulaqat ke baad

rang-e-ummid khilega ki bikhar jaega

waqt parwaz karega ki Thahar jaega

jit ho jaegi ya khel bigaD jaega

KHwab ka shahr rahega ki ujaD jaega