aaj phir dard uTha

aaj phir dard uThā dil ke nihāñ ḳhāne meñ

aaj phir log satāne ko chale ā.eñge

aaj phir karb ke sho.aloñ ko havā dūñgā maiñ

aur kuchh log bujhāne ko chale ā.eñge

aag se aag bujhī hai na bujhegī lekin

dard ko aag ke dariyā meñ utarnā hogā

aag aur dard ke me.aar parakhne ke liye

in añdheroñ kī fasīloñ se guzarnā hogā

maiñ añdheroñ kī rifāqat se nahīñ huuñ bezār

shām-e-tanhā.ī añdherā bhī bhalā lagtā hai

haif sad haif ki munkir thā zamāna jis kā

aaj vo jurm makānoñ meñ huā lagtā hai

laakh kamre ko TaTolā bhī magar kuchh na milā

farsh par ḳhuun kī do-chār lakīroñ ke sivā

jañg aur zulm ke asrār nihāñ ai zindāñ

jaan pā.egā bhalā kaun asīroñ ke sivā

dard dil hai ki bhaTaktī huī rūhoñ kā jalāl

qatl ho kar bhī dhaḌaktā hai jo vīrānoñ meñ

maiñ sulagtā hī rahā aur vo andāz-e-junūñ

chhup gayā aag lagā kar mire armānoñ meñ

aaj phir dard uTha dil ke nihan KHane mein

aaj phir log satane ko chale aaenge

aaj phir karb ke shoalon ko hawa dunga main

aur kuchh log bujhane ko chale aaenge

aag se aag bujhi hai na bujhegi lekin

dard ko aag ke dariya mein utarna hoga

aag aur dard ke mear parakhne ke liye

in andheron ki fasilon se guzarna hoga

main andheron ki rifaqat se nahin hun bezar

sham-e-tanhai andhera bhi bhala lagta hai

haif sad haif ki munkir tha zamana jis ka

aaj wo jurm makanon mein hua lagta hai

lakh kamre ko TaTola bhi magar kuchh na mila

farsh par KHun ki do-chaar lakiron ke siwa

jang aur zulm ke asrar nihan ai zindan

jaan paega bhala kaun asiron ke siwa

dard dil hai ki bhaTakti hui ruhon ka jalal

qatl ho kar bhi dhaDakta hai jo viranon mein

main sulagta hi raha aur wo andaz-e-junun

chhup gaya aag laga kar mere armanon mein