aaKHiri bar milo

āḳhirī baar milo aise ki jalte hue dil

raakh ho jaa.eñ koī aur taqāza na kareñ

chāk-e-va.ada na sile zaḳhm-e-tamannā na khile

saañs hamvār rahe sham.a kī lau tak na hile

bāteñ bas itnī ki lamhe unheñ aa kar gin jaa.eñ

aañkh uThā.e koī ummīd to āñkheñ chhin jaa.eñ

is mulāqāt kā is baar koī vahm nahīñ

jis se ik aur mulāqāt kī sūrat nikle

ab na haijān o junūñ kā na hikāyāt kā vaqt

ab na tajdīd-e-vafā kā na shikāyāt kā vaqt

luT ga.ī shahr-e-havādis meñ matā-e-alfāz

ab jo kahnā hai to kaise koī nauha kahiye

aaj tak tum se rag-e-jāñ ke ka.ī rishte the

kal se jo hogā use kaun sā rishta kahiye

phir na dahkeñge kabhī āriz-o-ruḳhsār milo

mātamī haiñ dam-e-ruḳhsat dar-o-dīvār milo

phir na ham hoñge na iqrār na inkār milo

āḳhirī baar milo

aaKHiri bar milo aise ki jalte hue dil

rakh ho jaen koi aur taqaza na karen

chaak-e-wada na sile zaKHm-e-tamanna na khile

sans hamwar rahe shama ki lau tak na hile

baaten bas itni ki lamhe unhen aa kar gin jaen

aankh uThae koi ummid to aankhen chhin jaen

is mulaqat ka is bar koi wahm nahin

jis se ek aur mulaqat ki surat nikle

ab na haijaan o junun ka na hikayat ka waqt

ab na tajdid-e-wafa ka na shikayat ka waqt

luT gai shahr-e-hawadis mein mata-e-alfaz

ab jo kahna hai to kaise koi nauha kahiye

aaj tak tum se rag-e-jaan ke kai rishte the

kal se jo hoga use kaun sa rishta kahiye

phir na dahkenge kabhi aariz-o-ruKHsar milo

matami hain dam-e-ruKHsat dar-o-diwar milo

phir na hum honge na iqrar na inkar milo

aaKHiri bar milo