aaKHiri bosa

mire hoñToñ pe us ke āḳhirī bose kī lazzat sabt hai

vo us kā āḳhirī bosa

jo mustaqbil ke har ik ḳhauf se āzād

ik raushan sitārā thā

guzartī raat ke nañge badan par til kī sūrat qā.em-o-dā.em

hamesha jāgne vaalā sitārā

maiñ jise is aag barsāte hue sūraj ke aage

jagmagātā dekh saktā huuñ

vo us kā āḳhirī bosa

jo is nafrat-bharī duniyā meñ

ik ḳhushbū kā jhoñkā thā

bikhartī pattiyoñ meñ mausam-e-gul ke ishāre kī tarah

ik Doltī ḳhushbū kā jhoñkā

maiñ jise is habs ke kaale qafas kī tīliyoñ se muskurātā dekh saktā huuñ

vo us kā āḳhirī bosa

jo in martī huī sadiyoñ meñ

ik be-ant lamha thā

talātum meñ kisī sāhil kī pahlī diid sā

anmol aur be-ant lamha

meñ jise ashkoñ kī is dīvār meñ

raḳhne banātā dekh saktā huuñ

mire hoñToñ pe us ke āḳhirī bose kī lazzat sabt hai

vo us kā āḳhirī bosa jo maiñ apne badan meñ

sāñs-sūrat aatā jaatā dekh saktā huuñ

lahū kī ḳhāmushī meñ sarsarātā dekh saktā huuñ

mere honTon pe us ke aaKHiri bose ki lazzat sabt hai

wo us ka aaKHiri bosa

jo mustaqbil ke har ek KHauf se aazad

ek raushan sitara tha

guzarti raat ke nange badan par til ki surat qaem-o-daem

hamesha jagne wala sitara

main jise is aag barsate hue suraj ke aage

jagmagata dekh sakta hun

wo us ka aaKHiri bosa

jo is nafrat-bhari duniya mein

ek KHushbu ka jhonka tha

bikharti pattiyon mein mausam-e-gul ke ishaare ki tarah

ek Dolti KHushbu ka jhonka

main jise is habs ke kale qafas ki tiliyon se muskuraata dekh sakta hun

wo us ka aaKHiri bosa

jo in marti hui sadiyon mein

ek be-ant lamha tha

talatum mein kisi sahil ki pahli did sa

anmol aur be-ant lamha

mein jise ashkon ki is diwar mein

raKHne banata dekh sakta hun

mere honTon pe us ke aaKHiri bose ki lazzat sabt hai

wo us ka aaKHiri bosa jo main apne badan mein

sans-surat aata jata dekh sakta hun

lahu ki KHamushi mein sarsaraata dekh sakta hun