aaKHiri faisla

kāñToñ kī chaTTān pe khaḌī

maiñ āñkhoñ kī sūiyāñ nikāl rahī huuñ

ye ilāqa kis saltanat meñ shāmil hai

mulūkiyat merī zabān pe kāñTe

halq meñ phandā

āñkheñ bāhar

shāh-balūt ke lambe daraḳhtoñ jaise

lambe puut bahut ho ga.e haiñ

jañgal meñ daraḳht ziyāda ho jaa.eñ

to aag lagā kar daraḳht kam kar diye jaate haiñ

bāhar niklī huī aañkh se za.afrān kā khet

aur kaTe hue bāzuoñ se ganne kī poriyāñ ban ga.ī haiñ

ham ne ek jhuuT bolā thā nā

ab saarī umr us ko sach sābit karne meñ guzār deñge

ham ki jo zindagī bhar

apne hisse kī roTī kamāne kī koshish karte haiñ

aur bhūke rahte haiñ

jhūTī aas kī chhatrī tale

bulbule jaise aañsū

batāshoñ kī tarah thaal meñ sajā.e

kab tak batlātī rahogī

ki vo tumhārā qātil nahīñ hai

qatl mahz sāniye meñ

zindagī kā rishta ḳhatm karne kā naam nahīñ

maujūd se inkār bhī

to qatl ke mutarādif hotā hai

merā jī kartā hai

vo jo sab mere qātil haiñ

maiñ unheñ havā kī tarah nigal jā.ūñ

kanTon ki chaTTan pe khaDi

main aankhon ki suiyan nikal rahi hun

ye ilaqa kis saltanat mein shamil hai

mulukiyat meri zaban pe kanTe

halq mein phanda

aankhen bahar

shah-balut ke lambe daraKHton jaise

lambe put bahut ho gae hain

jangal mein daraKHt ziyaada ho jaen

to aag laga kar daraKHt kam kar diye jate hain

bahar nikli hui aankh se zafran ka khet

aur kaTe hue bazuon se ganne ki poriyan ban gai hain

hum ne ek jhuT bola tha na

ab sari umr us ko sach sabit karne mein guzar denge

hum ki jo zindagi bhar

apne hisse ki roTi kamane ki koshish karte hain

aur bhuke rahte hain

jhuTi aas ki chhatri tale

bulbule jaise aansu

batashon ki tarah thaal mein sajae

kab tak batlati rahogi

ki wo tumhaara qatil nahin hai

qatl mahz saniye mein

zindagi ka rishta KHatm karne ka nam nahin

maujud se inkar bhi

to qatl ke mutaradif hota hai

mera ji karta hai

wo jo sab mere qatil hain

main unhen hawa ki tarah nigal jaun