aaKHiri harba

in dinoñ mere andar ghamsān kā ran paḌ rahā hai

apne ḳhilāf apnā hī difā.a kar rahā huuñ

jañg meñ har harba jaa.ez hotā hai

maiñ ne ek bahādur kī mānind

ochhā hathiyār istimāl na karne kā faisla kiyā thā

lekin jūñhī mere gird hisār tañg hone lagtā hai

merī zirah-baktar ke halqe TūTne lagte haiñ

aur bachāo ke har rāste par

TikTikī dikhā.ī detī hai

to maiñ koī na koī ochhā hathiyār

istimāl karne par majbūr ho jaatā huuñ

kisī sarkash ḳhayāl ke peT meñ

chupke se ḳhanjar utaar detā huuñ

kisī gustāḳh jazbe ko

mufāhamat ke bahāne bulā kar

dīvār meñ chun detā huuñ

maiñ jāntā huuñ

mere difā.a meñ

shigāf paḌ chuke haiñ

lekin merā irāda

āḳhir tak DaTe rahne kā hai

phir tamām rāheñ masdūd pā kar

āḳhirī harba istimāl karūñgā

apnī maut kā elaan is tarah karūñgā

jaise maiñ nahīñ

merā dushman marā ho

in dinon mere andar ghamsan ka ran paD raha hai

apne KHilaf apna hi difaa kar raha hun

jang mein har harba jaez hota hai

main ne ek bahadur ki manind

ochha hathiyar istimal na karne ka faisla kiya tha

lekin junhi mere gird hisar tang hone lagta hai

meri zirah-baktar ke halqe TuTne lagte hain

aur bachao ke har raste par

TikTiki dikhai deti hai

to main koi na koi ochha hathiyar

istimal karne par majbur ho jata hun

kisi sarkash KHayal ke peT mein

chupke se KHanjar utar deta hun

kisi gustaKH jazbe ko

mufahamat ke bahane bula kar

diwar mein chun deta hun

main jaanta hun

mere difaa mein

shigaf paD chuke hain

lekin mera irada

aaKHir tak DaTe rahne ka hai

phir tamam rahen masdud pa kar

aaKHiri harba istimal karunga

apni maut ka elan is tarah karunga

jaise main nahin

mera dushman mara ho