aaKHiri raat

chāñd TuuTā pighal ga.e taare

qatra qatra Tapak rahī hai raat

palkeñ āñkhoñ pe jhuktī aatī haiñ

añkhḌiyoñ meñ khaTak rahī hai raat

aaj chheḌo na koī afsāna

aaj kī raat ham ko sone do

khulte jaate haiñ simTe-sukḌe jaal

ghulte jaate haiñ ḳhuun meñ bādal

apne gulnār pañkh phailā.e

aa rahe haiñ isī taraf jañgal

gul karo sham.a, rakh do paimāna

aaj kī raat ham ko sone do

shaam se pahle mar chukā thā shahr

kaun darvāza khaTkhaTātā hai

aur ūñchī karo ye dīvāreñ

shor āñgan meñ aayā jaatā hai

kah do hai aaj band mai-ḳhāna

aaj kī raat ham ko sone do

jism hī jism haiñ, kafan hī kafan

baat sunte na sar jhukāte haiñ

amn kī ḳhair, kotvāl kī ḳhair

murde qabroñ se nikle aate haiñ

koī apnā na koī begāna

aaj kī raat ham ko sone do

koī kahtā thaa, Thiik kahtā thā

sar-kashī ban ga.ī hai sab kā shi.ār

qatl par jin ko e'tirāz na thā

dafn hone ko kyuuñ nahīñ tayyār

hosh-mandī hai aaj so jaanā

aaj kī raat ham ko sone do

chand TuTa pighal gae tare

qatra qatra Tapak rahi hai raat

palken aankhon pe jhukti aati hain

ankhDiyon mein khaTak rahi hai raat

aaj chheDo na koi afsana

aaj ki raat hum ko sone do

khulte jate hain simTe-sukDe jal

ghulte jate hain KHun mein baadal

apne gulnar pankh phailae

aa rahe hain isi taraf jangal

gul karo shama, rakh do paimana

aaj ki raat hum ko sone do

sham se pahle mar chuka tha shahr

kaun darwaza khaTkhaTata hai

aur unchi karo ye diwaren

shor aangan mein aaya jata hai

kah do hai aaj band mai-KHana

aaj ki raat hum ko sone do

jism hi jism hain, kafan hi kafan

baat sunte na sar jhukate hain

amn ki KHair, kotwal ki KHair

murde qabron se nikle aate hain

koi apna na koi begana

aaj ki raat hum ko sone do

koi kahta tha, Thik kahta tha

sar-kashi ban gai hai sab ka shiar

qatl par jin ko e'tiraaz na tha

dafn hone ko kyun nahin tayyar

hosh-mandi hai aaj so jaana

aaj ki raat hum ko sone do