aaKHiri sach

chehre tamām dhuñdle nazar aa rahe haiñ kyuuñ

kyuuñ ḳhvāb ratjagoñ kī havelī meñ dab ga.e

hai kal kī baat uñglī pakaḌ kar kisī kī maiñ

mele maiñ ghūmtā thā khilaunoñ ke vāste

jitne varaq likhe the mirī zindagī ne sab

āñdhī ke ek jhoñke meñ bikhre hue haiñ sab

maiñ chāhtā huuñ phir se sameTūñ ye zindagī

bachche tamām paas khaḌe haiñ bujhe bujhe

shoḳhī na jaane kyā huī rañgat kahāñ ga.ī

jaise kitāb chhoḌ ke jaate hue varaq

jaise ki bhūlne lage bachcha koī sabaq

jaise jabīñ ko chhūne lage maut kā araq

jaise charāġh niiñd kī āġhosh kī taraf

baḌhne lage añdhere kī zulfeñ bikher kar

bhūle hue haiñ hoñT hañsī kā pata talak

darvāza dil kā band huā chāhtā hai ab

kyā sochnā ki phuul se bachchoñ kā saath hai

ab maiñ huuñ aspatāl kā bistar hai raat hai

chehre tamam dhundle nazar aa rahe hain kyun

kyun KHwab ratjagon ki haweli mein dab gae

hai kal ki baat ungli pakaD kar kisi ki main

mele main ghumta tha khilaunon ke waste

jitne waraq likhe the meri zindagi ne sab

aandhi ke ek jhonke mein bikhre hue hain sab

main chahta hun phir se sameTun ye zindagi

bachche tamam pas khaDe hain bujhe bujhe

shoKHi na jaane kya hui rangat kahan gai

jaise kitab chhoD ke jate hue waraq

jaise ki bhulne lage bachcha koi sabaq

jaise jabin ko chhune lage maut ka araq

jaise charagh nind ki aaghosh ki taraf

baDhne lage andhere ki zulfen bikher kar

bhule hue hain honT hansi ka pata talak

darwaza dil ka band hua chahta hai ab

kya sochna ki phul se bachchon ka sath hai

ab main hun aspatal ka bistar hai raat hai