dar-madh-am

shāh-e-avadh se phone pe kal maiñ ne baat kī

ism-e-girāmī shaah kā abdussalām hai

pūchhā ki lucknow meñ haiñ maiñ ne kahā ki haañ

bole ki ye batā.iye kai din qayām hai

maiñ ne kahā ki aaj hī aayā huuñ yā-aḳhī

yuuñ to ḳhulūs-e-shāh meñ kis ko kalām hai

lekin ye aane vaale se jaane kā pūchhnā

kyā is meñ koī raaz hai yā kuchh payām hai

bole ki rāz-vāz to kuchh bhī nahīñ hai bas

sunday kī shaam pāñch baje izn-e-ām hai

maiñ tum ko lene vaqt pe pahuñchūñgā aur tum

milnā saḌak pe jo ki tumhārā maqām hai

maiñ ne kahā ki maiñ bhii, to bole ki haañ zarūr

ye kyuuñ samajh rahe ho ki izn-e-ta.ām hai

hotā agar ta.aam tumheñ kaun pūchhtā

is fasl meñ bas aam hī guThlī ke daam hai

tum ne takallufan bhī jo inkār kar diyā

ġhālib kā vo javāb ba-zehn-e-avām hai

al-qissa un ke saath chalā aayā paḳh banā

ḳhachchar ke ās-pās hī jis kā maqām hai

paḳh se agar kisī ko koī buġhz ho to ho

ġhālib ke is gad.he se to behtar ye naam hai

dekhā yahāñ jo aa ke to sab bhāñt-bhāñt ke

aamoñ kā chaar samt baḌā izhdihām hai

maiñ bhī sharīk ho gayā bos-o-kanār meñ

har aam khāne vaale kā ye tarz-e-ām hai

chausā dasharī ho ki safeda ho ek ek

chiknā rasīlā shīrīñ-dahan zard-fām hai

har samt guThliyoñ ke vo ambār haa.e haa.e

dil chhilke chhilke ho gayā ibrat-maqām hai

dil ne kahā miyāñ ye kahāñ le ke aa ga.e

dāvat nahīñ ye aam kī ye qatl-e-ām hai

maiñ ne DapaT ke dil se kahā chup ḳhamosh rah

rakh kaam apne kaam se terā jo kaam hai

tū bhī to ek guThlī-e-be-chhilkā hī to hai

aur vo bhī be-miThās baḌā terā naam hai

tujh se to baḌh ke aam kī guThlī hai kuchh sunā

miTTī meñ daab do to phir ik puurā aam hai

har lahza piitā rahtā hai tū ghūñT ḳhuun ke

aur aam aam hī nahīñ bharpūr jaam hai

dar-dast jām-e-ām hai aur to hai dar-baġhal

terī to ek buuñd bhī mujh par harām hai

dil ne kahā ki ḳhair tujhe kyā javāb duuñ

jab ash.hab-e-qalam hī tirā be-lagām hai

merā to ḳhuuñ harām hai tujh par halāl-ḳhor

terī ragoñ meñ kis kā lahū tez-gām hai

aatī nahīñ hai mujh ko ye bahr-ul-fasāhatī

banda abul-kalām na abdul-kalām hai

nā vaqt falsafe kā paḌhāne lagā sabaq

sab mahv-e-ām aur tū mahv-e-kalām hai

dil ke balīġh tanz se meñ saTpaTā gayā

shāyad ki ye amal bhī himāqat ke naam hai

ab jo nazar uThā ke udhar se idhar tilak

dekhā to ām-vām kā qissa tamām hai

shah-e-awadh se phone pe kal main ne baat ki

ism-e-girami shah ka abdussalam hai

puchha ki lucknow mein hain main ne kaha ki han

bole ki ye bataiye kai din qayam hai

main ne kaha ki aaj hi aaya hun ya-aKHi

yun to KHulus-e-shah mein kis ko kalam hai

lekin ye aane wale se jaane ka puchhna

kya is mein koi raaz hai ya kuchh payam hai

bole ki raaz-waz to kuchh bhi nahin hai bas

sunday ki sham panch baje izn-e-am hai

main tum ko lene waqt pe pahunchunga aur tum

milna saDak pe jo ki tumhaara maqam hai

main ne kaha ki main bhi, to bole ki han zarur

ye kyun samajh rahe ho ki izn-e-taam hai

hota agar taam tumhein kaun puchhta

is fasl mein bas aam hi guThli ke dam hai

tum ne takallufan bhi jo inkar kar diya

ghaalib ka wo jawab ba-zehn-e-awam hai

al-qissa un ke sath chala aaya paKH bana

KHachchar ke aas-pas hi jis ka maqam hai

paKH se agar kisi ko koi bughz ho to ho

ghaalib ke is gadhe se to behtar ye nam hai

dekha yahan jo aa ke to sab bhant-bhant ke

aamon ka chaar samt baDa izhdiham hai

main bhi sharik ho gaya bos-o-kanar mein

har aam khane wale ka ye tarz-e-am hai

chausa dashari ho ki safeda ho ek ek

chikna rasila shirin-dahan zard-fam hai

har samt guThliyon ke wo ambar hae hae

dil chhilke chhilke ho gaya ibrat-maqam hai

dil ne kaha miyan ye kahan le ke aa gae

dawat nahin ye aam ki ye qatl-e-am hai

main ne DapaT ke dil se kaha chup KHamosh rah

rakh kaam apne kaam se tera jo kaam hai

tu bhi to ek guThli-e-be-chhilka hi to hai

aur wo bhi be-miThas baDa tera nam hai

tujh se to baDh ke aam ki guThli hai kuchh suna

miTTi mein dab do to phir ek pura aam hai

har lahza pita rahta hai tu ghunT KHun ke

aur aam aam hi nahin bharpur jam hai

dar-dast jam-e-am hai aur to hai dar-baghal

teri to ek bund bhi mujh par haram hai

dil ne kaha ki KHair tujhe kya jawab dun

jab ashhab-e-qalam hi tera be-lagam hai

mera to KHun haram hai tujh par halal-KHor

teri ragon mein kis ka lahu tez-gam hai

aati nahin hai mujh ko ye bahr-ul-fasahati

banda abul-kalam na abdul-kalam hai

na waqt falsafe ka paDhane laga sabaq

sab mahw-e-am aur tu mahw-e-kalam hai

dil ke baligh tanz se mein saTpaTa gaya

shayad ki ye amal bhi himaqat ke nam hai

ab jo nazar uTha ke udhar se idhar tilak

dekha to aam-wam ka qissa tamam hai