aamad-e-shab

diye abhī nahīñ jale

daraḳht baḌhtī tīrgī meñ chhup chale

parind qāfiloñ meñ Dhal ke uḌ chale

havā hazār marg-e-ārzū kā ek ġham liye

chalī pahāḌiyoñ kī samt ruḳh kiye

khule samundaroñ pe kashtiyoñ ke bādbāñ khule

savād-e-shahr ke khañDar

ga.e dinoñ kī ḳhushbuoñ se bhar ga.e

akelī ḳhvāb-gāh meñ

kisī hasīñ-nigāh meñ

alam meñ lipTī chāhateñ varūd-e-shab se jaag uThīñ

hai dil ko bekalī siyāh raat aa.egī

jilau meñ dukh kī laag ko liye hue

nagar nagar pe chhā.egī

diye abhi nahin jale

daraKHt baDhti tirgi mein chhup chale

parind qafilon mein Dhal ke uD chale

hawa hazar marg-e-arzu ka ek gham liye

chali pahaDiyon ki samt ruKH kiye

khule samundaron pe kashtiyon ke baadban khule

sawad-e-shahr ke khanDar

gae dinon ki KHushbuon se bhar gae

akeli KHwab-gah mein

kisi hasin-nigah mein

alam mein lipTi chahaten warud-e-shab se jag uThin

hai dil ko bekali siyah raat aaegi

jilau mein dukh ki lag ko liye hue

nagar nagar pe chhaegi