aamad

kabhī ḳhushk mausam meñ purvā jo chaltī

to banjar pahāḌoñ ghane gard-ālūd shahroñ se katrā ke

ham tak pahuñchtī

hameñ tund yādoñ ke girdāb maiñ

Dūbte aur ubharte hue dekh kar ham se kahtī

maiñ un sab ke jismoñ se mas ho ke aa.ī huuñ

un ke pasīne kī ḳhushbū ko

apne libāde meñ bhar kar

hathelī pe rakh kar maiñ laa.ī huuñ

kabhī surḳh sūraj nikaltā

to ham us se kahte

tumhārī dahaktī huī aañkh kā raaz kyā hai

vo kahtā

maiñ in sab kī āñkhoñ ke ġhurfoñ se

ye saarī ujlī tamāzat churātā rahā huuñ

maiñ daryūza-gar un charāġhoñ se ḳhud ko jalātā rahā huuñ

unheñ ham ne DhūñDā

kabhī sabz shabnam ke chhīñToñ meñ tāroñ kī rotī huī anjuman maiñ

kabhī sub.h kī qatl-gāh shab ke ghāyal badan meñ

unheñ ham ne āvāz dī kū-ba-kū

ġham meñ Duubī huī bastiyoñ se aTe ḳhāk-dān-e-vatan meñ

magar vo nahīñ the kahīñ bhī nahīñ the

kahīñ un ke qadmoñ kī halkī sī āvāz tak bhī nahīñ thī

phir ik roz dhartī kā mausam jo badlā

to bādal ne shānoñ se ham ko hilā kar jagāyā

kahā un ke aane kā paiġhām aayā

chahakte parindoñ ne shāḳhoñ se uḌ kar

havāoñ meñ ik dā.era sā banāyā

kahā un ke aane kā paiġhām aayā

dhanak saat rañgoñ meñ lipTī huī

ik kamāñ ban ke zāhir huī

ham se kahne lagī apnī āñkhoñ se dekhā hai maiñ ne unheñ

tez qadmoñ se aate hue

shaam hañsne lagī

us kī āñkhoñ meñ ḳhushiyoñ ke aañsū the

aariz pe shabnam

nagīnoñ kī sūrat chamakne lagī thī

kabhi KHushk mausam mein purwa jo chalti

to banjar pahaDon ghane gard-alud shahron se katra ke

hum tak pahunchti

hamein tund yaadon ke girdab main

Dubte aur ubharte hue dekh kar hum se kahti

main un sab ke jismon se mas ho ke aai hun

un ke pasine ki KHushbu ko

apne libaade mein bhar kar

hatheli pe rakh kar main lai hun

kabhi surKH suraj nikalta

to hum us se kahte

tumhaari dahakti hui aankh ka raaz kya hai

wo kahta

main in sab ki aankhon ke ghurfon se

ye sari ujli tamazat churaata raha hun

main daryuza-gar un charaghon se KHud ko jalata raha hun

unhen hum ne DhunDa

kabhi sabz shabnam ke chhinTon mein taron ki roti hui anjuman main

kabhi subh ki qatl-gah shab ke ghayal badan mein

unhen hum ne aawaz di ku-ba-ku

gham mein Dubi hui bastiyon se aTe KHak-dan-e-watan mein

magar wo nahin the kahin bhi nahin the

kahin un ke qadmon ki halki si aawaz tak bhi nahin thi

phir ek roz dharti ka mausam jo badla

to baadal ne shanon se hum ko hila kar jagaya

kaha un ke aane ka paigham aaya

chahakte parindon ne shaKHon se uD kar

hawaon mein ek daera sa banaya

kaha un ke aane ka paigham aaya

dhanak sat rangon mein lipTi hui

ek kaman ban ke zahir hui

hum se kahne lagi apni aankhon se dekha hai main ne unhen

tez qadmon se aate hue

sham hansne lagi

us ki aankhon mein KHushiyon ke aansu the

aariz pe shabnam

naginon ki surat chamakne lagi thi