aansu

mere pahlū meñ jo bah nikle tumhāre aañsū

ban ga.e shām-e-mohabbat ke sitāre aañsū

dekh saktā hai bhalā kaun ye paare aañsū

merī ā.ankhoñ meñ na aa jaa.eñ tumhāre aañsū

sham.a kā aks jhalaktā hai jo har aañsū meñ

ban ga.e bhīgī huī raat ke taare aañsū

meñh kī būñdoñ kī tarah ho ga.e saste kyuuñ aaj

motiyoñ se kahīñ mahñge the tumhāre aañsū

saaf iqrār-e-mohabbat ho zabāñ se kyūñkar

aañkh meñ aa ga.e yuuñ sharm ke maare aañsū

hijr abhī duur hai maiñ paas huuñ ai jān-e-vafā

kyuuñ hue jaate haiñ bechain tumhāre aañsū

sub.h-dam dekh na le koī ye bhīgā āñchal

merī chuġhlī kahīñ khā deñ na tumhāre aañsū

apne dāmān o garebāñ ko maiñ kyuuñ pesh karūñ

haiñ mire ishq kā in.aam tumhāre aañsū

dam-e-ruḳhsat hai qarīb ai ġham-e-furqat ḳhush ho

karne vaale haiñ judā.ī ke ishāre aañsū

sadqe us jān-e-mohabbat ke maiñ 'aḳhtar' jis ke

raat bhar bahte rahe shauq ke maare aañsū

mere pahlu mein jo bah nikle tumhaare aansu

ban gae sham-e-mohabbat ke sitare aansu

dekh sakta hai bhala kaun ye pare aansu

meri aaankhon mein na aa jaen tumhaare aansu

shama ka aks jhalakta hai jo har aansu mein

ban gae bhigi hui raat ke tare aansu

meinh ki bundon ki tarah ho gae saste kyun aaj

motiyon se kahin mahnge the tumhaare aansu

saf iqrar-e-mohabbat ho zaban se kyunkar

aankh mein aa gae yun sharm ke mare aansu

hijr abhi dur hai main pas hun ai jaan-e-wafa

kyun hue jate hain bechain tumhaare aansu

subh-dam dekh na le koi ye bhiga aanchal

meri chughli kahin kha den na tumhaare aansu

apne daman o gareban ko main kyun pesh karun

hain mere ishq ka inam tumhaare aansu

dam-e-ruKHsat hai qarib ai gham-e-furqat KHush ho

karne wale hain judai ke ishaare aansu

sadqe us jaan-e-mohabbat ke main 'aKHtar' jis ke

raat bhar bahte rahe shauq ke mare aansu